2019 йил 1 январь ҳолатига кўра, Ўзбекистонда автомобилларга газ тўлдириш компрессор шохобчалари (АГTКШ) сони 692 тани ташкил этган, жорий йилда яна 15 та шохобча қурилиши учун рухсат берилган. Айрим манбаларда «Ўзтрансгаз» акциядорлик жамияти мавжуд шохобчаларда ойлик лимит миқдорини 12 дан 17 фоизгача қисқартиргани айтилмоқда. Бу ҳудудлардаги газ қуйиш шохобчаларида нарх-навонинг ўзбошимчалик билан оширишга сабаб бўладими? ЎзА нашри мазкур саволга жавоб берди.
«Ўзтрансгаз» акциядорлик жамиятидан маълум қилишларича, «Ўзтрансгаз» ҳар йили 1-сентябрга қадар истеъмолчиларнинг зарурий газ ҳажмлари тўғрисидаги талабномаларини йиғиб, уларни «Ўзбекнефтгаз» акциядорлик жамиятига киритади.
«Ўзбекнефтгаз» ҳам ўз навбатида ҳар йили 1 августгача бўлган муддатда келгуси йил учун табиий газни қазиб олиш, қайта ишлаш, узатиш, сақлаш, тақсимлаш билан боғлиқ газга бўлган эҳтиёж ва технологик йўқотишларни аниқлайди.
Хулосалар 15 сентябрга қадар Иқтисодиёт ва саноат вазирлигига тақдим этилади. Вазирлик томонидан табиий газ баланси ресурс ҳажмлари тақсимоти (ойлик, йиллик шаклда) тасдиқланиб, «Ўзбекнефтгаз»га, сўнг ижросини таъминлаш учун «Ўзтрансгаз»га етказилади.
«Ўзтрансгаз» мазкур (ойлик, йиллик шаклдаги) табиий газ баланс ҳажмларини ҳудудий газ таъминоти филиаллари кесимида ҳудудлардаги АГTКШнинг истеъмол қилган газ ҳажмларидан келиб чиқиб, мутаносиб равишда тақсимлайди, филиалларга жўнатади.
Ҳудудий газ таъминоти филиаллари эса, ҳар бир истеъмолчи кесимида ресурсни тақсимлаб, улар билан белгиланган тартибда табиий газ етказиб бериш шартномаларини имзолайди.Шунга кўра, истеъмолчиларни газ билан барқарор таъминлаш, узилишларнинг олдини олиш, энг асосийси, мўътадил нарх сиёсатини юритиш чоралари кўрилмоқда.
Хусусан, Ўзбекистон табиий газ истеъмолчиларини барқарор табиий газ билан таъминлаш мақсадида ҳудудий газ таъминоти филиалларида кеча-ю кундуз хизмат кўрсатадиган Авария диспетчерлик хизматларидан ташқари, қўшимча муҳандис техник ходимлардан иборат – Авария тиклаш бригадалари ташкил қилинган. Улар керакли асбоб-анжомлар, машина механизмлар, пайвандлаш агрегатлари ва бошқа зарурий техник воситалар ҳамда материал техник ресурслар билан тўла таъминланган.Шунингдек, барча газ тақсимлаш пунктларида навбатдан ташқари режим созлаш ишлари ўтказилиб, кунлик назорат ўрнатилган. Аҳоли хонадонларида табиий газдан оқилона ва хавфсиз фойдаланиш, ис газидан заҳарланишнинг олдини олиш бўйича телерадио ва матбуотда мунтазам тарғибот-ташвиқот ишлари олиб борилмоқда.
Бош Прокуратура ҳузуридаги Мажбурий ижро бюроси ҳамда «Ўздавнефтгазинспекция»нинг ҳудудий бўлинмаларининг жойлардаги ходимлари билан газ таъминоти филиаллари ҳамкорликда газдан оқилона ва тежамкорлик билан фойдаланиш, газдан ноқонуний фойдаланилаётган истеъмолчиларни аниқлаш, дебитор қарздорликни камайтириш бўйича чора-тадбирлар ишлаб чиқилган. Айни вақтда ҳудудларда бу борадаги ишлар изчил давом эттирилмоқда.
Изоҳ (0)