Адлия вазирлиги ҳар ярим йилда нотариусларнинг иш фаолияти сифатини баҳолаш тизимини йўлга қўйди. Бу ҳақда «Дарё»га Адлия вазирлиги Жамоатчилик билан алоқалар бўлими хабар берди.
Бундан кўзланган мақсад тизимда хизмат кўрсатиш сифати ва тезкорлигини ошириш, улар фаолиятидаги камчилик ва муаммоларни аниқлаш, шаффоф ва очиқ ишлайдиган кадрлар салоҳиятини янада яхшилашдан иборат.
Нотариусларнинг 2018 йил иккинчи ярим йиллик фаолиятини баҳолаш махсус автоматлаштирилган электрон дастур орқали амалга оширилди.
Сифатни баҳолашда нотариал ҳаракатлар сони, нотариуснинг хизмат фаолиятига оид маълумотлар ва унинг фаоллиги «Нотариус»автоматлаштирилган ахборот тизимидаги маълумотлар асосида автоматик тарзда амалга оширилди.
Баҳолаш натижалари кўра жами 635 нафар нотариуслардан 21 нафари фаолияти «аъло», 341 нафари фаолияти «яхши», 209 нафари фаолияти «қониқарли» ва 64 нафари фаолияти эса «талабга жавоб бермайди» деб баҳоланди.
Баҳолаш рейтингида дастлабки иккита энг юқори ўринни эгаллаган нотариус Тошкент шаҳрида ва бир нафари Навоий вилоятида фаолият юритади. Улар пойтахтнинг Миробод туман 9-сон ДНИ нотариуси Азиза Шоназарова, Олмазор туман 11-сон ДНИ нотариуси Фозилхўжа Набиев ҳамда Навоий вилояти Нурота туман ДНИда фаолият юритувчи Икром Исаев.
Рейтингда фаолият юритаётган нотариусларнинг 10 фоизи (64 нафари) «талабга жавоб бермайди» деб баҳоланган. Уларнинг 38 нафари Андижон вилоятида, саккиз нафари Қашқадарёда, олти нафари Фарғонада, тўрт нафари Тошкент шаҳрида, уч нафари Самарқанд, икки нафардан Наманган, Хоразмда ҳамда бир нафари Сирдарё вилоятларига тўғри келади.
Адлия вазирлиги томонидан иш фаолияти «аъло» деб топилган нотариусларни рағбатлантириб бориш ва «талабга жавоб бермайди» деб баҳоланган нотариуслар фаолиятини яхшилаш чораларини кўриш тизими яратилган.
Рейтингнинг тўлиқ рўйхати билан www.minjust.uz сайтида танишиш мумкин.
Ҳозирги кунда вазирлик томонидан нотариуслар фаолиятини бевосита фуқаролар томонидан нотариал хизматларни олиш вақтида баҳолаш тизимини жорий этиш бўйича ишлар амалга оширилмоқда.
Изоҳ (0)