Адлия вазири Русланбек Давлетов бошчилигида бўлиб ўтган мажлисда адлия органлари ва муассасалари томонидан қонун ижодкорлиги ва ҳуқуқни қўллаш соҳасида 2018 йил давомида амалга оширилган ишлар, йўл қўйилган камчиликлар ва жорий йил давомида бажарилиши лозим бўлган устувор вазифалар атрофлича муҳокама этилди. Бу ҳақда «Дарё»га Адлия вазирлиги Жамоатчилик билан алоқалар бўлими хабар берди.
Видеоконференцалоқа шаклида ўтказилган тадбирда адлия органлари ва муассасаларининг барча даражадаги раҳбар ва масъул ходимлари иштирок этди.
2018 йилда Адлия органлари фаолиятини тубдан ислоҳ қилишга доир 28 та муҳим фармон ва қарорлар қабул қилинди. Адлия вазирлиги томонидан 280 дан ортиқ қонун ҳужжатлари лойиҳалари ишлаб чиқилди, ушбу кўрсаткич ўтган йилга нисбатан икки баробарга, 2016 йилга нисбатан эса тўрт баробарга ошганлигини кўрсатади.
Қонун ҳужжатлари лойиҳалари ҳуқуқий экспертизадан ўтказиш 14 фоизга ошиб 1 889 тани ташкил этди. 584 та идоравий норматив-ҳуқуқий ҳужжатлар давлат рўйхатидан ўтказилди. Ушбу кўрсаткич 2017 йилга нисбатан 21 фоизга ошган.
Адлия органлари ва муассасаларининг 190 нафар ходими стажировка ўташ ва тажриба алмашиш учун хорижий давлатларга юборилган.
Вазирлик тизимида жисмоний ва юридик шахслардан келиб тушган жами 50 мингдан ортиқ мурожаатларнинг қарийб 37 мингтаси қонуний ҳал этилган. Адлия органлари ва муассасалари томонидан 86 мингдан ортиқ уйма-уй юриб, аҳоли билан бевосита суҳбатлар қилиниб, ҳуқуқий маслаҳатлар берилди. Туман (шаҳар) адлия бўлимлари томонидан ташкил этилган шахсий ва сайёр қабуллар давомида 16 мингдан ортиқ мурожаат қабул қилиниб, 15,5 мингтаси қонуний ҳал этилди.
2018 йилда 11 мингга яқин ташкилотларда ҳуқуқни қўллаш амалиёти ўрганилган, 1,1 миллион қонунбузилишлар аниқланган. Натижада 10 мингдан ортиқ тақдимнома, судларга 54 миллиард сўмлик 13,6 мингта даъво аризалари, 35 600 та огоҳнома, 2 400 та маъмурий ва 127 та жиноий таклиф киритилган. Таъсир чорлар натижасида 49 миллиард сўмлик 14,7 мингта даъво аризалари қаноатлантирилган, олти минг нафар мансабдор шахс интизомий, 3,5 минг нафари маъмурий жавобгарликка тортилган, 511 нафар шахс билан тузилган меҳнат шартномалари бекор қилинган.
Ҳуқуқий хизматни сифатини яхшилаш мақсадида қўшича равишда 703 нафар нотариал идоралар ходимлари штати жорий этилди. Бу дегани, ҳар бир нотариусга тўғри келадиган 42700 та аҳоли сони 36400 тага, яъни 14 фоизга камайди.
Айрим адлия органлари ва муассасалари томонидан фаолиятда йўл қўйилган хато ва камчиликлар ҳам мавжуд. Мажлисда улар кескин танқид қилинди. 2018 йилда Адлия органи ходимлари хатти-ҳаракатлари юзасидан 1 308 та шикоят келиб тушган бўлиб, шикоятларнинг аксарияти Тошкент шаҳри, Андижон, Наманган ва Бухоро вилоятларига, 82 таси Давлат хизматлари агентлигига тўғри келмоқда.
Изоҳ (0)