«Алпомиш» достони Тошкентда илк маротаба тўлиқ ва жонли тарзда ижро этилди

Ўзбекистон Тасвирий санъат галереясида OXUS Culture жамияти ташаббуси билан мамлакат номоддий маданий мероси шинавандалари учун навбатдаги достон кечалари тақдим этилди. Бу ҳақда ЎзА хабар бермоқда.

Кечада халқ меросининг ноёб намуналаридан бўлган «Алпомиш» достони Тошкентда илк маротаба, тўлиқ, жонли тарзда ижро этилди.

Мазкур санъат даргоҳида мунтазам тарзда миллий меросга бағишланган тадбирларда Шеробод достончилик мактаби анъаналаридан «Малла савдогар», «Келиной», «Оллоназар Олчинбек» халқ достонлари Ўзбекистон халқ бахшиси Абдуназар Поёнов ижросида, Хоразм достончилик мактабининг энг гўзал намуналари «Ошиқ Ғариб ва Шоҳсанам» ҳамда «Гўрўғлининг туғилиши» достонлари Ўзбекистонда хизмат кўрсатган артист Отахон Матёқубов ижросида, шунингдек, Қорақалпоғистон достончилиги туркумидан «Саётхон-Ҳамро» достони эса ёш бахшилар Гулшинар Кудайбергенова ва Эрисбай Асқаров томонидан тўлиқ ижро этилди.

Кечада мардлик, жасорат, меҳр-муҳаббат, садоқат тараннум этилган мерос достон, халқ қўшиқлари, термалар Ўзбекистон халқ бахшиси Абдуназар Поёнов томонидан ижро этилди.