Самарқанд шаҳридаги тўртта чорраҳада йўл ҳаракати қоидабузарликларини автоматлаштирилган сурат ва видеоназорат қилувчи қурилма ишга тушди. Бу ҳақда «Зарафшон» хабар бермоқда.
Назорат қурилмалари қуйидаги кўчаларда ўрнатилган: Регистон майдони рўпарасидаги пиёдалар ўтиш жойи, Мирзо Улуғбек ва Бўстонсарой кўчаси кесишмаси, Мирзо Улуғбек — Шоҳрух, Мир Саид Барака — Мирзо Улуғбек кўчалари кесишмаларида.
Янги технологиялар автомобиль кўп ҳаракатланадиган кўчаларда туну-кун «навбатчилик« қилади. Камералар онлайн тизимда светофор чироқларига амал қилмаслик, рулда телефон орқали суҳбатлашиш каби қоидабузарликларни қайд этиб боради. Йил сўнгига қадар ушбу қурилмалар Самарқанд шаҳридаги барча кўчаларда ўрнатилиши белгиланган.
Бунга қадар вилоят трассаларида тўртта «Арена« русумли қурилма ўрнатилган бўлиб, улар автомашиналарнинг тезлигини назорат қиларди. Ушбу тизим орқали 40 мингга яқин қоидабузарлик аниқланган.
Маълумот учун, 2018 йилда Самарқанд йўлларида 310 минг қоидабузарлик аниқланган. 13 минг нафар пиёдаларга йўл ҳаракати қоидаларини бузганлик учун маъмурий чоралар қўлланилган.
Изоҳ (0)