Samarqand shahridagi to‘rtta chorrahada yo‘l harakati qoidabuzarliklarini avtomatlashtirilgan surat va videonazorat qiluvchi qurilma ishga tushdi. Bu haqda “Zarafshon” xabar bermoqda.
Nazorat qurilmalari quyidagi ko‘chalarda o‘rnatilgan: Registon maydoni ro‘parasidagi piyodalar o‘tish joyi, Mirzo Ulug‘bek va Bo‘stonsaroy ko‘chasi kesishmasi, Mirzo Ulug‘bek — Shohrux, Mir Said Baraka — Mirzo Ulug‘bek ko‘chalari kesishmalarida.
Yangi texnologiyalar avtomobil ko‘p harakatlanadigan ko‘chalarda tunu-kun “navbatchilik“ qiladi. Kameralar onlayn tizimda svetofor chiroqlariga amal qilmaslik, rulda telefon orqali suhbatlashish kabi qoidabuzarliklarni qayd etib boradi. Yil so‘ngiga qadar ushbu qurilmalar Samarqand shahridagi barcha ko‘chalarda o‘rnatilishi belgilangan.
Bunga qadar viloyat trassalarida to‘rtta “Arena“ rusumli qurilma o‘rnatilgan bo‘lib, ular avtomashinalarning tezligini nazorat qilardi. Ushbu tizim orqali 40 mingga yaqin qoidabuzarlik aniqlangan.
Ma’lumot uchun, 2018-yilda Samarqand yo‘llarida 310 ming qoidabuzarlik aniqlangan. 13 ming nafar piyodalarga yo‘l harakati qoidalarini buzganlik uchun ma’muriy choralar qo‘llanilgan.
Izoh (0)