«Ўзметкомбинат» биринчи маротаба ферросилиция ва ферросиликомарганец экспорт қилишни бошлайди. Бу ҳақда компания матбуот хизматига таяниб, Spot хабар берди.
Дастлабки ҳисоб-китобларга кўра, ушбу маҳсулотларни хорижга етказиб бериш йилига 12 млн доллар миқдорида фойда олиб келади. Тахминан ўнтача мамлакатлар корхонага ҳамкорлик таклифини билдирган бўлиб, улар орасида Россия, Қозоғистон ва Европанинг кўпгина давлатлари бор.
Амалга оширилган лойиҳа қиймати 60 млн долларни ташкил этди. Шундан 40 млн доллар «Ўзметкомбинат»нинг ўз маблағлари ҳисобланиб, 20 млн доллар эса имтиёзли шартларда Кореяга қарашли «Эскимбанк» томонидан тақдим этилган.
«Бугунги кунда ферросилиций ва ферросиликомарганец қора металлургияда кенг тарқалган бўлиб, ундан пўлат хусусиятларини мустаҳкамлашда фойдаланилади. Содда қилиб айтганда – уни чидамли, пишиқ ва қаттиқ бўлишини таъминлайди. Шу сабабли у саноатда энг кўп фойда келтирадиган материаллардан бири ҳисобланади. Жаҳон бозорида унинг 1 тонна нархи 1500 долларни ташкил этади. Таҳлилчиларнинг таъкидлашича, ферроқотишмасига бўлган талаб доимий равишда ориб бормоқда, бу эса маҳсулот бахоси динамикасига ижобий таъсир кўрсатмоқда», — дейди ферроқотишмалар ишлаб чиқариш бўйича цех раҳбари Дилшод Дўсматов.
Унинг айтишича, 2019 йилда ушбу маҳсулотни ишлаб чиқариш ҳажми 6 минг тоннани ташкил этади ва у компания эҳтиёжлари учун сарфланади.
Изоҳ (0)