10 январнинг эътиборга молик янгиликлари — «Дарё» дайжестида.
Ўзбекистонлик 32 ёшли Гули Муродова мультимиллионер ва лорд, Консерватив мусулмон форуми асосчиси, барон ва Буюк Британия Лордлар палатасининг умрбод аъзоси бўлган Муҳаммад Илтафга турмушга чиққани ҳақида хабар берилган эди. Ушбу хабар чоп этилганидан сўнг ижтимоий тармоқларда ўзбекистонлик Гули Муродова ҳақида қўпол ва ҳақоратомуз изоҳлар ёзиб қолдирила бошлади. Асоссиз гап-сўзларга нуқта қўйиш мақсадида Гули Шайх (Муродова) таҳририятга мурожаат қилди ва «Дарё» мухбири Севара Нишонова билан суҳбат давомида шахсий ҳаёти ҳақидаги маълумотларга ойдинлик киритди.
***
Сурия демократик кучлари томонидан 6—7 январь кунлари Хаджин аҳоли пунктида олиб борилган махсус операциялар натижасида саккиз нафар хорижликлар қўлга олинган.
Шулардан икки нафари Ўзбекистон фуқаролари — Одил Раҳимов (Абу Амина Ўзбекий, 58 ёш) ва Фарҳод Қадеров (Абу Билол Ўзбекий, 28 ёш). Шунингдек, Тожикистон, Россия, Украина, АҚШ ва Германия фуқаролари ҳам бор.
***
Қиш фасли ҳатто «чилла» кирган бўлса-да, ҳамон айтарли совуқ ҳам бўлмади. Oппoқ қор ҳам яхшироқ ёғмади. 5 февралгача қиш чилласи давом этишини эътиборга олиб, бу даврда об-ҳаво қандай бўлиши, қайси ҳудудларда қор ёғиши ҳақида «Ўзгидромет» Бош синоптиги Ирина Зайцева маълумот берди.
Бу йилги қиш ҳам бундан истисно бўлмаяпти, совуқни ва қорни яхши кўрадиганларни зумрад қиш об-ҳавоси билан хурсанд қилгани йўқ. Асосан ёмғир ёғиб, баъзи жойларда қорга айланган бўлса-да, ҳарорат илиқ.
Ҳозирги пайтгача бу йилги қишнинг энг совуқ давр — ўтган йилнинг 23—24 декабрига тўғри келмоқда. Шунда шимолда ҳарорат 16-18 даража атрофида, фақат Устюрт платосидагина 20-22 даража совуқни ташкил қилди.
***
Маъмурий жавобгарлик тўғрисидаги Кодексга паспорт тизимини бузганлик учун жавобгарликни юмшатувчи ўзгартиришлар киритилди.
Паспорт тизими қоидаларига риоя этиш учун масъул бўлган шахслар томонидан фуқароларнинг паспортсиз ёки шахсини тасдиқловчи бошқа ҳужжатларсиз яшашига йўл қўйилиши, шунингдек вақтинча/доимий пропискасиз ёхуд ҳисобда турмасдан яшашига йўл қўйилиши энг кам иш ҳақининг беш баравари миқдорида жарима солишга сабаб бўлади.
Бундан аввал жарима миқдори энг кам иш ҳақининг 10 баравари миқдорида, йил давомида қайта содир этилган тақдирда 15 бараваргача жарима солишга сабаб бўлган.
***
Таниқли санъаткор, машҳур доирачи Рустам Убайдуллаев вафот этди.
У доира санъати устаси ҳисобланган. Ўзбекистон халқ хофизи Фахриддин Умаров билан 40 йилдан ортиқ вақт давомида бирга ишлаган.
Рустам Убайдуллаевнинг кенжа ўғли Достон Убайдуллаев ҳам ота касбидан кетиб, таниқли санъаткорга айланди.
Изоҳ (0)