Навоий шаҳридаги икки мактабгача таълим муассасасида тарбиячи ҳамда хизматчиларнинг ҳуқуқлари тикланиб, уларга 127 миллион 866 минг сўмлик иш ҳақлари ундириб бериладиган бўлди. Бу ҳақда «Халқ сўзи» хабар бермоқда.
Шаҳардаги 21 ва 22-мактабгача таълим муассасаларида ўтган йилнинг 23 июль санасидан эътиборан капитал таъмирлаш ишлари бошланган эди. Натижада иккала боғчадаги тарбиячи ҳамда техник ходимларга боғча мудиралари улардан ёзма равишда ариза олмасдан туриб «ўз ҳисобидан» таътил бериб юборган.
— Ушбу ҳолат юзасидан ходимлар мурожаати асосида ўрганиш ўтказилганда иш берувчилар томонидан бир қатор қонунбузилиш ҳолатларига йўл қўйилганлиги аниқланди, — дейди Навоий шаҳар адлия бўлими бошлиғи Азамат Холмўминов. — Жумладан, Меҳнат Кодексининг 159-моддасида ходимнинг айбисиз яроқсиз маҳсулот тайёрланганда ва бекор туриб қолинган вақтда унинг ўртача иш ҳақи сақланиши белгиланган. Юқоридаги ҳолатда ҳам ходимларнинг ҳеч қандай айби йўқ. Бундан ташқари, мактабгача таълим муассасаси мудиралари ходимларининг ишламай туриб қолган даврида бошқа меҳнат билан шуғулланишини таъминлаш бўйича тегишли юқори турувчи органга мурожаат билан ҳам чиқмаган.
Навоий шаҳар мактабгача таълим бўлимига адлия идораси томонидан киритилган тақдимномага асосан, 2018 йилнинг июль ойи охиридан ноябрь ойигача ишламай турган ходимларга 127 миллион 866 минг сўм ундирилиши белгиланди. Шундан 65 миллион 290 минг сўми тўлаб берилди. Қолган қисми ҳам тез орада ижобий ҳал этилади.
Бундан ташқари, ходимлари ишсиз қолган даврда уларнинг бошқа меҳнат билан шуғулланишини таъминлаш ҳақида таклиф билан чиқмаганликлари учун мактабгача таълим муассасалари мудираларига тегишли тартибда чора кўриш бўйича шаҳар мактабгача таълим бўлимига тақдимнома киритилди.
Изоҳ (0)