Президент Шавкат Мирзиёевнинг Германияга расмий ташрифи арафасида? 2019 йил 15 январда Берлин шаҳрида «Буюк Ипак йўли мероси Ўзбекистон ва Германия ўртасидаги кўприк вазифасини бажаради» мавзусида халқаро илмий-маданий форуми бўлиб ўтади. Бу ҳақда «Дарё»га ЎзЭОАВМА матбуот хизмати маълум қилди.
Ўзбекистоннинг Берлиндаги элчихонасида «Ўзбекистон маданий мероси дунё тўпламларида» лойиҳасига оид китоб-альбомлар кўргазмасининг очилиш маросими бўлиб ўтади.
Форумнинг ёрқин намойиши сифатида Президентнинг табрик сўзи битилган «Ўзбекистоннинг маданий мероси Германия коллекцияларида» иллюстрацияли китоб-альбомининг тақдимоти ўтказилади. Ушбу китоб-альбом Ўзбекистоннинг китоб чоп этиш тарихига замонавий мультимедиа технологияларидан фойдаланган ҳолда чоп этилган биринчи китоб сифатида киради: уни нафақат ўқиш, балки ўз смартфонида алоҳида бетларини, шу жумладан, 3D таъсири билан кўриш мумкин.
Берлинда Германиянинг етакчи санъатшунос олимлари Берлин, Дрезден, Лейпциг ва Штутгард музейларидаги мумтоз ўзбек санъати коллекциялари ҳақида сўзлаб беради.
Медиа-форум доирасида «Ўзбекистон Буюк Ипак йўлининг юраги» деб аталган тантанали кеча бўлиб ўтади, унга 150 та қатнашчи ва меҳмонлар таклиф этилган. Медиа-ивент якунида миллий таомлар тортиқ этилиб, «Палов — ўзбек таомлари бренди» видеоролигининг тақдимоти бўлиб ўтади. Кечани ўзбек санъаткорларининг концерт дастури безатади.
Маълумот учун, Ўзбекистон Президенти 21—23 январь кунлари Германияга расмий ташриф билан боради.
Изоҳ (0)