Сурхондарё вилоятининг Шеробод туманидаги «Калламозор» қишлоғидан оқиб ўтадиган Шеробод дарёси ўзани селлар оқибатида кенгайиб, 100 метрдан ошиб кетган, 2,5 минг аҳоли истиқомат қиладиган қишлоқ аҳолисига қийинчиликлар туғдираётганди. Бу ҳақда «Халқ сўзи» хабар берди.
Парламент қуйи палатаси депутатлари томонидан аҳоли ва ҳомийлар билан ҳамкорликда қишлоқ билан M-39 халқаро автомобиль трассасини боғловчи, барча талабларга жавоб берадиган, хавфсиз, замонавий кўприк қурилиши бошлаб юборилди. Бугунги кунга келиб, кўприкнинг қарийб 80 фоиз қисми қуриб битказилди. Аммо маблағ етишмаслиги сабабли қолган қурилиш ишлари тўхтаб қолди.
Олий Мажлис Қонунчилик палатаси депутати Муродулла Турсунов 2018- йилнинг 25 декабрь куни ушбу кўприкнинг битмасдан турган қисмини охиригача бунёд этишда амалий ёрдам беришни сўраб, Бош вазирнинг биринчи ўринбосарига мурожаат йўллади.
29 декабрь куни депутатнинг ушбу мурожаатида кўрсатиб ўтилган масала ечими юзасидан амалий ёрдам кўрсатиш мақсадида Сурхондарё вилояти ҳокимлиги, Автомобиль йўллари давлат қўмитаси ва «Кўприкқурилиш» трестига топшириқлар берилгани ҳақидаги жавоб хати олинди. Унга кўра, мазкур масала назоратга олиниб, энди амалий ҳаракатлар бошланмоқда.
Изоҳ (0)