Муддатли ҳарбий хизматчи, оддий аскар Андрей Фумин Чирчиқ шаҳридаги 14-Меҳрибонлик уйида тарбияланган. Болалигидан ҳарбий соҳага меҳри тушган ўғлон орзусига эришди. Ҳозир у Шарқий ҳарбий округида ўз йигитлик бурчини адо этмоқда, деб хабар беради Мудофаа вазирлиги матбуот хизмати.
Ватанпарварлик ойлиги доирасида ҳарбий округ қўшинлари қўмондонлиги томонидан Андрей Фуминга ўзи тарбияланган меҳрибонлик уйига меҳмонга келиш ва ёшлар билан самимий мулоқот қилиш имкони яратилди.
– Биласиз, Меҳрибонлик уйига ҳарбийлар кўп ташриф буюради. Мен ҳар гал улар билан суҳбатлашганимда қалбимда ўзгача илиқликни ҳис қилардим. Эгнидаги либоси ўзига ярашган, гап-сўзларидан ўзига ишонч ва қатъият сезилиб турадиган бу инсонларга қараб, «қанийди мен ҳам келажакда улардек ҳарбий бўлсам», деб ният қилардим. Йиллар ўтиб ҳавас истакка, истак эса мақсадга айланди. Мана ниятим амалга ошди. Энди мен ҳам Ватан посбониман ва бундан ғурурланаман, – дейди Андрей болажонлар билан суҳбатда.
Андрейни ҳавас билан тинглаб ўтирган юзлаб қоракўзлар аскар акаларини бирин-кетин саволга тута бошладилар.
«Аскар бўлиш учун спорт билан шуғулланиш шартми?», «Ҳарбий қисмда аскарлар учун яратилган шароитлар ҳақида гапириб беринг», «Бўш вақтларингиз қандай ўтади?», «Келажакда қайси касбни танламоқчисиз?» дея Меҳрибонлик уйи тарбияланувчилари томонидан берилган саволларга батафсил жавоблар қайтарилди.
Самимий ўтган мулоқот болалар учун таассуротларга бой бўлди.
Шунингдек, шу куннинг ўзида Чирчиқ шаҳрида «Аскар – маҳалла меҳмони» тадбири ҳам ўтказилди. Тадбир доирасида айни вақтда Қуролли Кучлар сафида хизмат қилаётган муддатли ҳарбий хизматчи, оддий аскар Ҳусниддин Толипов ўз уйига меҳмон бўлди. Яқинлар дийдори, бир пиёла чой устидаги суҳбат кўнгилларни энг яхши ҳислар билан ошно қилди.
Изоҳ (0)