«Амирсой» тоғ-чанғи курортининг очилиши кечиктирилади. Бу ҳақда курортнинг Facebook’даги расмий саҳифасида маълум қилинди, шунингдек Spot нашрининг манбалари ҳам ушбу ахборотни тасдиқлаган.
Компания вакилларининг сўзларига кўра, ушбу қарор техник ва бошқа масалалардан келиб чиққан ҳолда қабул қилинган: «Лойиҳа кўп йиллар давомида тоғда фаолият кўрсатади, бизнинг олдимиздаги вазифа эса уни асосли қилиб тайёрлашдир. Ярим йил—бир йил — бу унчалик катта муддат эмас, бироқ биз учун муҳим танаффус, боиси бу ерда курорт ва умуман мамлакат имиджи масаласи турибди».
Компания вакилларининг қўшимча қилишича, курорт ҳозир айтилаётганидан-да эртароқ очилиши ҳам мумкин — агар қорли об-ҳаво шароити кузатилса.
Ушбу курортни дастлаб 2018 йил 15 декабрида фойдаланишга топшириш режалаштирилган эди, бироқ кейинроқ муддат ўзгартирилди ва ўриндиқли дор йўли 2019 йил январида ишга тушиши маълум қилинди.
«Амирсой» — бу Ўзбекистоннинг жаҳон даражасидаги илк тоғ-чанғи курортидир. Лойиҳанинг қурилиши уч босқични ўз ичига олган: турли мураккабликдаги тоғ-чанғи трассалари тармоғини яратиш, еттита дор йўли, сноуборд-парк, яхмалак майдонларини қуриш.
Изоҳ (0)