Ўзбекистон делегацияси Япониянинг АЭС соҳасидаги тажрибаси билан танишди

Ўзбекистон делегацияси Япониянинг атом энергетикаси соҳасидаги илғор тажрибаси билан танишиш мақсадида 2018 йил 19—23 декабрь кунлари ушбу мамлакатга сафар қилди, деб хабар берди «Ўзатом» агентлиги ахборот хизмати.

Делегация таркиби Ўзбекистон Республикаси Олий Мажлиси Қонунчилик палатаси депутатлари, «Ўзатом» агентлиги ва ОАВ вакилларидан ташкил топди.

Ташриф давомида Япония парламенти маслаҳатчилар палатаси вице-президенти А.Гунджи билан учрашув бўлиб ўтди ва у палатанинг атом энергетикаси соҳасидаги роли ҳақида сўзлаб берди. Олий Мажлис Қонунчилик палатаси Спикери ўринбосари Борий Алихонов қайд этганидек, Ўзбекистон Япония билан стратегик ҳамкорликка катта аҳамият беради.

Томонлар ўртасида, шу жумладан, атом энергиясидан тинчлик мақсадларида фойдаланиш соҳасида парламентлараро алмашув ва парламентлараро алоқаларни ривожлантириш, шунингдек, икки мамлакатнинг ваколатли идоралари ўртасида тажриба алмашишга доир келишувларга эришилди.

Япониянинг атом соҳасида тартибга солиш агентлиги раиси М.Ясуи ҳамда Япониянинг атом энергияси бўйича агентлиги бош котиби Т.Кодама билан музокаралар бўлиб ўтди.

Атом энергияси бўйича агентлик томонидан атом энергетикасини ривожлантириш соҳасида миллий кадрларни тайёрлаш, илмий-тадқиқот фаолияти бўйича ушбу соҳада ўз инновацион технологияларини яратишга доир лойиҳа тақдим қилинди, бу эса асосий фаолиятнинг 89 фоизини ташкил этади.

Японияда 2011 йилнинг мартидаги энг йирик зилзила ва ундан сўнг рўй берган цунами ва Фукусима АЭС оқибатлари бартараф этилганидан сўнг аҳоли фикр-мулоҳазаларини ҳисобга олган ҳолда, АЭС ни эксплуатация қилишга талаблар янада қатъийлаштирилди. Ҳозирги пайтда аввал фаолият кўрсатган 17 АЭС ва 54 реактордан 40 таси МАГАТЭ талабларига мувофиқ, ишга туширишга шай ҳолатга келтирилди.

Учрашувлар натижалари бўйича томонлар инновацион технологияларни қўллашда қўшма ҳамкорликни ривожлантириш, тажриба алмашиш ҳамда илмий-амалий семинарлар ва тренинглар ўтказиш истагини билдирди.

Иқтисодиёт, савдо ва саноат бўйича давлат министри Й.Секи билан учрашув бўлиб ўтди ва у Ўзбекистонда амалга оширилаётган ислоҳотларга, шу жумладан, валюта сиёсатини эркинлаштириш, рухсатнома бериш тартиботи соддалаштирилганига юқори баҳо берди.

Делегация томонидн кўриб чиқиш учун қатор таклифлар берилди. Ушбу таклифлар Япония томонидан Ўзбекистонда атом энергетикаси бўйича ўқув-ахборот маркази яратилишига кўмаклашиш, ўзбек талабаларининг Япония олий ўқув юртларида таълим олишига кўмаклашиш, шунингдек, Ўзбекистонда атом энергетикаси бўйича синов модулини яратишни кўзда тутади.

Ташриф давомида делегация Ибараки префектурасидаги Токай шаҳарчаси ҳудудида жойлашган АЭСни бориб кўрди. Бугунги кунда «Токай-2» АЭС да хавфсизликни кучайтириш бўйича барча қўшимча тадбирлар амалга оширилди ва станцияни ишга туширишга рухсат олинди. Япония томони атом энергиясидан тинчлик мақсадида фойдаланиш соҳасида ҳамкорлик қилишга тайёр эканлигини билдирди.