Ўзбекистонда 2018 йил охирида маҳаллий сегментда фаол доменларнинг умумий сони 65 мингтага етди. Айни пайтда уларнинг 12 мингдан ортиғи жорий йилда ташкил этилган доменлардир, дея хабар беради ЎзА.
«UZ» домен зонаси маъмуриятидан олинган маълумотларга кўра, юридик шахслар учун регистратор мавқеини эркин олиш имкониятининг тақдим этилиши янада қулай ва арзон хизматлар таклиф этадиган янги регистраторларнинг пайдо бўлишига замин яратди.
Тобора ривожланаётган рақобат домен номлари бозорида фаолият юритаётган маҳаллий компанияларнинг рақобатбардошлигини ошириш, янги хизматларни фаол жорий этиш, акциялар ўтказиш ва рўйхатга олиш нархларини пасайтиришга туртки берди. «UNITEL» МЧЖ компаниясининг 2018 йилда регистратор мавқеини олгани бунга ёрқин мисолдир. Ҳозирги кунда мазкур компания домен саноати бозорида қатор хизматларни тақдим этиб келмоқда.
Жорий йилда «UZINFOCOM давлат ахборот тизимларини яратиш ва қўллаб-қувватлаш бўйича ягона интегратор» МЧЖ домен номлари регистратори сифатидаги фаолиятини тўхтатади. Буни регистраторлар рақобатбардош тармоғининг ривожланиши, ахборот технологиялар бозорида домен номларини рўйхатга олиш хизматлари сони ва сифатининг ошиши тақозо этди.
Изоҳ (0)