28 декабрнинг асосий янгиликлари — «Дарё» дайжестида.
Бугун, 28 декабрь куни Ўзбекистон Республикаси Президенти Шавкат Мирзиёев мамлакат парламентига навбатдаги Мурожаатномани тақдим этди.
Шавкат Мирзиёев кириб келаётган янги — 2019 йилни Ўзбекистонда «Фаол инвестициялар ва ижтимоий ривожланиш йили» деб эълон қилишни таклиф этди. Ўзбекистон Президентининг бу таклифи йиғилганлар томонидан гулдурос қарсаклар билан қўллаб-қувватланди.
Шунингдек, Президент ўз нутқи давомида Ўзбекистонда солиқ имтиёзлари босқичма-босқич бекор қилиниши ва келажакда ҳамма бир хил солиқ тўлаши, Ўзбекистонда ёшларга бир вақтда бир нечта ОТМга ҳужжат топшириш имкони берилиши, Ўзбекистон Осиё ўйинларига мезбонлик қилиши кераклиги, Ўзбекистонда урбанизация даражаси 2030 йилгача 60 фоизга етказилиши, вилоятлар бой бўлса, давлат бой бўлиши, ногиронлиги бўлган фарзандига қараётган оналарга алоҳида нафақа тури жорий этилиши ва бошқалар ҳақида гапирди.
Президент парламентга мурожаатдан сўнг, пойтахт марказида ташкил этилган Янги йил байрами майдонига ташриф буюрди. Давлат раҳбари байрам томошасига келган одамлар билан суҳбатлашиб, болажонларга совғалар берди.
***
27 декабрь куни Шайх Зайид номидаги Абу-Даби маданий мерослар фестивали доирасида ўзбекистонлик ошпазлар 10 минг кишилик ош дамлади.
10 минг киши учун 1,5 тоннадан ортиқ гуруч дамланган. Марказий майдонда битта асосий катта қозон ва унинг ёнида 8 та кичкина қозон ўрнатилган.
Ошни тайёрлаш давомида 30 нафар ўзбекистонлик ошпаз иштирок этган.
***
Бугун, 27 декабрь куни «Ўзбекконцерт» давлат муассаси томонидан миллий маданиятни янада ривожлантириш концепцияси ва 2018 йил якунлари доирасида йиғилиш бўлиб ўтди.
Йиғилишда эстрада санъати соҳасида учраётган баъзи камчиликлар ва муаммоларни бартараф этиш мақсадида бир қатор вазифалар белгилаб олинди.
Қайд этилишича, Жаҳонгир Позилжонов ижросидаги #СелфиМенингПрезидентим қўшиғи бўйича суриштирув ишлари бошланган, бунинг натижаси албатта ОАВда эълон қилинади.
***
Ҳиндистонлик аёл 65 ёшида иккинчи бор оналик бахтига муяссар бўлди.
Маълум бўлишича, боланинг отаси 80 ёшда. Шундай қилиб аёл табиий йўл билан туғруқни амалга оширган энг кекса аёл бўлди. Бунгача рекорд қайд этганлар сунъий уруғлантириш йўли билан фарзанд дунёга келтирган.
Нашрнинг қайд этишича, бу туғруқ аёл учун иккинчиси бўлиб, бундан саккиз йил олдин у ўғил фарзанд кўрган. Шифокорлар она ва боланинг саломатлиги мутлақо яхши эканлигини ва тез фурсатларда уларга уйга жавоб беришини маълум қилди.
***
Актриса Муқаддас Саъдуллаева турмуш ўртоғи Йигитали Мамажонов, қайнонаси ва фарзандлари билан тушган суратларини Instagram’даги саҳифасига жойлаштирди.
Жуфтлик 23 декабрь куни ўғил фарзандли бўлган ва чақалоққа Абубакр деб исм қўйган эди.
Изоҳ (0)