Ташқи ишлар вазирлигининг 2018 йилги фаолияти якунларига бағишлаб ўтказилган анжуман журналистлар иштирокидаги очиқ мулоқот тарзида давом этди. Бу ҳақда ЎзА хабар берди.
Анжуман доирасида Ташқи ишлар вазирининг биринчи ўринбосари Илҳом Неъматов Ўзбекистон — Ҳиндистон муносабатлари ҳақида тўхталар экан, журналистларга Президент Шавкат Мирзиёевнинг 2019 йилнинг январь ойида Ҳиндистоннинг Гужорот штатида бўлиб ўтадиган «Фаол Гужорот 2019» тадбирларида иштирок этиши ҳақида айтиб ўтди.
«Шавкат Мирзиёевнинг Ҳиндистонга давлат ташрифи чоғида Ҳиндистон бош вазири Нарендра Моди давлат раҳбарини «Фаол Гужорот 2019« тадбирларида иштирок этишга таклиф этган ва бу Президент томонидан мамнуният билан қабул қилинганди», — деди вазирнинг биринчи ўринбосари.
Илҳом Неъматовнинг таъкидлашича, ушбу йирик тадбир Ҳиндистонда анъанавий тарзда ўтказиб келинади. Давлат раҳбарлари, бош вазирлар ва вазирлар даражасидаги шахслар иштирок этадиган форумда Ўзбекистоннинг экспорт салоҳияти, миллий маҳсулотлари, сайёҳлик салоҳияти намойиш этилади.
Изоҳ (0)