Ажиниёз номидаги Нукус давлат педагогика институтида келгуси йил бошидан IELTS сертификатлари бериладиган марказ иш бошлайди. Бу ҳақда ЎзА хабар берди.
Бу Нукус давлат педагогика институти ҳамда GRBS Халқаро ўқув ва имтиҳон маркази ўртасида имзоланган ҳамкорлик тўғрисидаги меморандум доирасида амалга оширилади.
GRBS Халқаро ўқув ва имтиҳон маркази бош директори Баҳром Гурбановнинг таъкидлашича, Ўзбекистонда кўп йиллардан буён самарали хизмат кўрсатиб келаётган Ҳaйдар Алиев номидаги Озарбайжон маданият маркази ҳамда Озарбайжоннинг Ўзбекистондаги элчихонасининг ташаббусига мувофиқ марказ раҳбарлари ва мутахассислари Қорақалпоғистондаги таълим муассасалари билан биргаликда чет тиллари, дефектологияга ва бошқа ихтисосликлар учун муҳим бўлган таълим дастурларини амалга оширишни мақсад қилган.
GRBS Халқаро ўқув ва имтиҳон маркази 2005 йилдан буён Озарбайжоннинг маънавият-ахборот маркази сифатида фаолият юритиб келаётган ташкилот бўлиб, Ўзбекистонда жорий йил октябр ойида иш бошлаган. Марказ Ўзбекистоннинг таълим тизимининг сифатини орттиришга, ёшларнинг халқаро ҳамжамиятга интеграциялашувига кўмаклашиш ҳамда мамлакатдаги кадрларнинг профессионал тайёргарлигини ва кўникмаларини орттириш мақсадида иш олиб бормоқда.
Мазкур халқаро таълим маркази дунёда етакчи бўлган бир қатор ташкилотларнинг халқаро квалификациясини тасдиқлайдиган ҳужжатларга эга бўлишни хоҳлайдиганлар учун тест синовларини ўтказиш ва уларни халқаро ҳуқуқ талабларига мос белгиланган тартибда ҳужжатлаштириш ҳуқуқига эга.
Мазкур марказ томонидан, шунингдек, Нукус давлат педагогика институти ҳузуридаги академик лицейи базасида 4—16 ёшдаги болалар учун инглиз тилида ўқитиладиган «IT School» очиш ҳам режалаштирилмоқда. Унда Foundation дастури асосида химия, биология, физика йўналишлари бўйича хорижий давлатларда таълим олиш ҳамда илмий тадқиқот ишларини олиб боришни мақсад қилганлар таҳсил олиши мумкин.
Изоҳ (0)