Тошкент шаҳридаги «Фаровон» ресторанида Сирдарё вилояти ҳокими Ғофиржон Мирзаев пойтахтдаги олий ўқув юртларида таҳсил олаётган сирдарёлик талабалар билан учрашди. Бу ҳақда «Халқ сўзи» хабар берди.
Тадбирда 700 нафардан ошиқ йигит-қиз иштирок этди.
Сирдарё вилоят хокими талабаларга вилоятда олиб борилаётган кенг кўламли ўзгаришлар, янгиланишлар ҳақида батафсил маълумот берди. Айни вақтда барча соҳаларда малакали кадрларга эҳтиёж катта эканлигини айтиб ўтди. Белгиланган лойиҳаларни амалга оширишда етук кадрларнинг роли катта эканлигини такидлади.
Сирдарё вилоятида турли тармоқлар, айниқса, тиббиёт соҳасида кадрлар етишмовчилиги сезилаётганлиги айтилди. Шунингдек, инженер, архитектор, Мирзачўл воҳаси учун ўта зарур бўлган ирригатор ва мелиоратор, агрономларга ҳам талаб юқори эканлиги қайд этилди.
Вилоят ҳокимлиги берган маълумотга кўра, бугунги кунда пойтахтдаги олийгоҳларда 3500 нафардан зиёд сирдарёлик талаба таҳсил олмоқда.
Вилоят ҳокими Тошкентда талим олаётган ёшларни келгусида Сирдарё вилоятида олиб борилаётган қурилишларда иштирок этишга, янги завод-фабрикалар, иқтисодиёт корхоналарига ишга чақирди.
Америка Қўшма Штатларидаги нуфузли компаниялардан бирида юқори маош олиб ишлаётган Шоҳруҳ Исоқуловнинг вилоятга келиб ишлашга қарор қилганлигини ибрат қилиб кўрсатди.
Изоҳ (0)