Тошкент вилояти ҳокимлигида солиқ тизимидаги ислоҳотлар самарадорлигини таъминлаш ва бюджетга қўшимча даромад захираларини аниқлаш юзасидан амалга оширилаётган чора-тадбирлар таҳлилига бағишланган тадбир ташкил этилди. Бу ҳақда «Дарё»га Тошкент вилояти давлат солиқ бошқармаси Жамоатчилик билан алоқалар ва ҳуқуқий ахборот шўъбаси хабар берди.
Вилоят ҳокимлиги, прокуратура, давлат солиқ бошқармаси, молия бошқармаси ва тегишли корхона ҳамда ташкилотлар вакиллари иштирок этган тадбирда солиқ тўловларининг бугунги ҳолати, соҳадаги муаммолар ҳам атрофлича таҳлил этилди.
Тадбирда қайд этилганидек, вилоят давлат солиқ хизмати органлари томонидан ўтказилган хатлов натижасида 2231 нафар шахснинг меҳнат фаолияти қонунийлаштирилди ва мазкур объектларга 693 млн. сўм солиқ ҳисобланди. Шунингдек, 955 та объектда ўтказилган ўрганиш натижасида аниқланган ҳолат бўйича 418,5 млн. сўм қўшимча солиқ тўлови ҳисоб-китоб қилинди. Бозорлар ва савдо комплексларида 500 нафар шахснинг фаолияти қонунийлаштирилди ва 107 млн. сўм қўшимча солиқ манбаи аниқланди.
Маълумки, давлат бюджети солиқ ва бошқа мажбурий тўловлар орқали шаклланади. Бу маблағ ижтимоий соҳалардаги харажатларга, аҳоли турмуш фаровонлигини оширишга, давлат чегаралари дахлсизлигини таъминлашга йўналтирилади. Шу боис солиқ тўловларини ўз вақтида амалга ошириш ҳар биримизнинг фуқаролик бурчимизга айланмоғи лозим, дейилади хабарда.
Изоҳ (0)