Ўзбекистонда сув таъминоти оғир ҳудудларда қудуқлар қазиш учун 40 млрд сўм имтиёзли кредит ажратилади

2019—2020 йилларда сув таъминоти оғир бўлган ҳудудлардаги аҳоли томорқаларига сув етказиб бериш учун суғориш қудуқларини қазишга доир чора-тадбирлар тўғрисидаги ҳукумат қарори қабул қилинди. Бу ҳақда «Ҳуқуқий ахборот» канали маълум қилди.

Қарор билан 2019—2020 йилларда сув таъминоти оғир, истеъмолга яроқли сув захиралари етарли бўлган маҳалла фуқаролар йиғинлари ҳудудларидаги аҳоли томорқаларига сув етказиб бериш мақсадида суғориш қудуқларини қазиш дастури ва уни амалга ошириш учун Ўзбекистон фермер, деҳқон хўжаликлари ва томорқа ер эгаларини қўллаб-қувватлаш жамғармаси томонидан фермер, деҳқон хўжаликлари ва томорқа ер эгаларига ажратиладиган имтиёзли кредит ресурслари тасдиқланди.

Дастур доирасида жами 85 та туманда 40 миллиард сўм, шундан:

2019 йилда 23 миллиард 173 миллион 100 минг;

2020 йилда 16 миллиард 826 миллион 900 минг сўм миқдорида кредит ажратилиши кўзда тутилган.