Тошкент шаҳар ИИББ «лайклар» учун Instagram’га безориликлари акс этган видеони жойлаштирган ёшларга нисбатан чора кўрди. Бу ҳақда ИИББ хабарида айтилади.
Instagram ижтимоий тармоғига ўзларини «блогерлар», «влогерлар», «пранкерлар» деб ҳисоблайдиган бир гуруҳ ёшлар томонидан тайёрланган иккита видеолавҳа жойлаштирилди. Видеоларнинг бирида икки нафар ёш йигитлар пойтахт супермаркетларидан бирида ўзларини жанжаллашаётгандай тутиб, жамоат тартибини бузганлари туширилган. Иккинчисида эса «безорилардан» бири ўртоғи билан транспорт воситасини олиб қочишганини саҳналаштиришган, шунингдек уларнинг машинаси бошқа бир автомобиль томонидан йўл ҳаракати қоидаларини қўпол тарзда бузган ҳолда таъқиб қилинаётгани акс этган.
Тошкент шаҳар ИИББ томонидан Instagram’га жойланган ушбу видеолар ўрганилиб, унда иштирок этган ёшларнинг шахслари аниқланган. Улар: олий ўқув даргоҳлардан бирининг талабалари – 20 ёшли Умиджон Ш. ва Акбар А., 18 ёшли Давид Т. ва 17 ёшли Евгений К.
Супермаркетдаги «можаро» видеосида Умиджон ва Давид иштирок этган. Ушбу факт асосида улар Ўзбекистон Республикаси Маъмурий жавобгарлик тўғрисидаги кодекснинг 183-моддасига мувофиқ майда безориликлари учун жавобгарликка тортилди.
Транспорт воситасини олиб қочишни ҳам Умиджон содир этган. Уни таъқиб қилиб келаётган Акбар Умиджоннинг онасига тегишли автомобилни бошқариб борган. Олиб қочилган транспорт воситаси «ролини» эса Акбарга тегишли машина ижро этди. Ушбу факт асосида Умиджон ва Акбар Ўзбекистон Республикаси Маъмурий жавобгарлик тўғрисидаги кодекснинг 135-моддаси бўйича («Йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши») жавобгарликка тортилди. Нима сабабдан йигитларга нисбатан қарама-қарши ҳаракат йўлига чиққанликлари, светофорнинг тақиқловчи белгисида ҳаракатланганлари ва автомобилни хавфсизлик камарини тақмаган ҳолда бошқарганлари учун чора кўрилмади, деган савол туғилиши мумкин. Ўзбекистон Республикаси Маъмурий жавобгарлик тўғрисидаги кодекснинг 34-моддасига («Бир неча ҳуқуқбузарликни содир этганлик учун маъмурий жазо қўлланиш») мувофиқ, бирор бир шахс бир неча маъмурий ҳуқуқбузарлик содир этган бўлиб, шу ҳақдаги ишлар бир вақтнинг ўзида айни бир орган (мансабдор шахс) томонидан кўриб чиқилаётган бўлса, бу шахсга нисбатан қўлланиладиган узил-кесил жазо оғирроқ маъмурий жазони назарда тутувчи санкция доирасида қўлланилади.
Бундан ташқари, Умиджон Ш., Акбар А., Давид Т. ва ўртоқларининг ҳаракатларини видеога туширган Евгений К. билан профилактик суҳбат ўтказилди.
Тошкент шаҳар ИИББ ижтимоий тармоқларда ўзини мартабасини ошириш билан банд бўлган ёшларни бирор бир ҳаракатни тасвирга олишдан олдин мулоҳаза қилишга чақирди. Юқоридаги тўрт нафар «қаҳрамонлар» каби видео тасвирга олишдан олдин, жамоат тартибини бузмаётганлигингизга ва инсонларнинг ҳаётига хавф туғдирмаётганлигингизга ишонч ҳосил қилинг. Чунки «блогерлар-влогерлар-пранкерлар» автопойга уюштирганларида инсонлар хавфсизлигини хавф остига қўйган, дейилади хабарда.
Изоҳ (0)