Наманган шаҳрининг «Чорсу» деҳқон бозорига чақирилган тез тиббий ёрдам машинаси бозор дарвозаси қулф бўлгани учун ичкарига киролмай, 15 дақиқа туриб қолди. Бу ҳақда «Дарё» мухбири Азизбек Абдувалиев хабар бермоқда.
9 декабрь куни ушбу чақириқ бўйича мазкур манзилга шаҳар тез тиббий ёрдам бўлими махсус бригада шифокори, реаниматолог Баҳромжон Пузалов борган.
— Maxсус бригада учун 15 дақиқа тугул 1,5 дақиқа ҳам катта вақт. Бизнинг реанимобиль боришдан олдин «Damas»да тез ёрдам ҳам келган экан. Икки машина дарвоза олдида туриб қолдик, калит топилмайди. Охири қидир-қидирлар билан калит топиб келинди, дарвоза очилди. Қани энди бозор ичкарисига ўта олсак! Бозорнинг машина ва пиёдалар юришига мўлжалланган йўлагини расталар, сотувчилар эгаллаб олган. Бизнинг Hyundai автомобилимизнинг габарити катта, бир амаллаб «Damas»ни ўтказиб юбордик. Ҳамкасбларимиз кириб, биринчи ёрдам кўрсатиб, ток урган фуқарони орқа дарвозадан олиб чиқиб кетган.
Бу ҳолатни дарвоза олдидаги «Paynet» шохобчаси ва озиқ-овқат дўкони эгалари ҳам тасдиқлади. Уларнинг айтишича, калит олдинлари ҳар эҳтимолга қарши уларда турган, бироқ мазкур ҳодисадан аввал 10-15 кун давомида уларда берилмаган.
—Бу ерга тўсатдан тез тиббий ёрдам ва ёнғинни ўчириш машиналари келиб қолиши мумкин. Ўша пайтда қоравуллар бўлмай қолишини ҳисобга олиб, калит менга ёки рўпарамдаги дўкон сотувчиларига қолдириб кетиларди. Ўша куни аксига олиб калит бизда бўлмаган, — дейди «Paynet» шохобчасида ишловчи йигит.
«Дарё» мухбири бозорга борган куни дарвоза очиқ эканлиги, калит эса ҳам назорат маскани, ҳам пайнет вазифасини бажарувчи шохобчада эканлигига гувоҳ бўлди.
Наманган шаҳар тез тиббий ёрдам бўлими катта шифокори Жамолиддин Жалиловга кўра, бозор ҳудудида фуқарони электр токи урганлиги ҳақидаги мурожаат 9 декабрь куни соат 13.25 да олинган ва орадан бир дақиқа ўтиб, 13.26 да махсус бригадага узатилган. Соат 13.30 да реаномобил бозор дарвозаси олдида бўлган.
—Шаҳар ичида мурожаат келиб тушган манзилга 20 дақиқада етиб боришимиз керак. Афсуски, ўша кунги каби ҳолатлар бунга баъзан халақит беряпти. Кўчаларда машиналаримизга йўл бермаслик, кечки пайт ёритиш чироқларининг ишламаслиги, гоҳида кўча номлари ўрнатилмагани, кўп қаватли уйлар, подьездлар, хонадонлар рақамланмагани, кириш йўлакларига цемент ва металл тўсиқлар қўйилгани ҳам вақтимизни олади, — дейди Жамолиддин Жалилов.
Баҳромжон Пузаловнинг айтишича, юз берган ҳолат юзасидан бозор маъмуриятига шикоят қилган. Чунки бунга ўхшаш воқеалар олдин ҳам икки-уч маротаба рўй берган.
«Чорсу» бозори маъмуриятининг ёнғин хавфсизлиги бўйича мутахассиси Шавкатжон Матмусаевга кўра, бозорнинг уч дарвозаси бўлиб, иккиси автомобиллар кириб-чиқиши учун мўжалланган. Дарвозалар 18.00 дан соат 6.00 гача юк машиналари учун очилади. Фуқаролар ва юк аравалари кириб-чиқиши учун тонгги 6.00 дан кечки 20.00 гача очиқ бўлиб, машиналар бозор ҳудудига киришининг олдини олиш учун занжир ташланиб, қулф солиб қўйилади.
—10 нафар қоровулимиз бор, калитлар одатда уларда бўлади. Қаергадир чиққан тақдирда калитлар дарвоза яқинидаги дўконларда қолдирилади. Тирбандликка келсак, йўлакларда кўпинча мева-чева, тузланган бодринг-помидор сотувчилар эгаллаб оляпти. Уларни ҳар сафар огоҳлантирамиз, қолаверса, ўзларининг махсус жойлари ҳам бор, лекин харидор чекка жойга бормаслигини баҳона қилиб, дарвоза олдига келиб олишяпти, —дейди Шавкатжон Матмусаев.
Мутахассиснинг айтишича, 9 декабрь кунги ҳолатда қўшни маҳалладаги симёғочдан электр сими узилиб, бозор ҳудудидаги тикувчилик устахонаси томига тушган, устахонага кирган фуқарони бу ердаги тарнов орқали ток урган. Мазкур ҳолат ўша куниёқ электр тармоқлари корхонаси ходимлари томонидан бартараф этилган.
Маълумот учун, шаҳар тез тиббий ёрдам бўлими томонидан олиб кетилган фуқарога ўша жойнинг ўзида ёрдам кўрсатилди ва шифохонага етказилди. Унинг ҳолати қониқарли эканлиги айтилмоқда.
Изоҳ (0)