Ўзбекистон рақобат қўмитаси Ucell’нинг 100 фоиз улушини сотиб олиши сабабини тушунтирди

Ўзбекистон хусусийлаштирилган корхоналарга кўмаклашиш ва рақобатни ривожлантириш давлат қўмитаси Telia Company компаниясидан Ucell мобил операторининг 100 фоизли улушини сотиб олганлигига изоҳ берди, деб ёзади «Газета.uz».

— Нима учун Давлат рақобат қўмитаси Ucell улушини сотиб олди? Қўмита томонидан тижорат объектини сотиб олиш жараёнида қандай ҳужжатлар талаб қилинади?

— «Хусусий мулкни ҳимоя қилиш ва мулкдорлар ҳуқуқларининг кафолатлари тўғрисида»ги Ўзбекистон Республикаси қонунининг 4-моддасига мувофиқ, мулкдор ўзига қарашли мол-мулкка ўз хоҳишига кўра ҳамда ўз манфаатларини кўзлаб эгалик қилади, ундан фойдаланади ва уни тасарруф этади. Мулкдор ўз мол-мулкига нисбатан қонунга зид бўлмаган ҳар қандай ҳаракатларни бажаришга ҳақли.

Давлат рақобат қўмитаси давлат мулкларини бошқариш соҳасида давлат бошқарув органи ҳисобланиб, унга юклатилган вазифаларни бажариш учун акциядорлик жамиятлари, бошқа хўжалик жамиятлари ва ширкатлари акцияларини (улушлари, пайлари) сотиб олиш ҳуқуқига эга.

Ўзбекистон Республикаси Фуқаролик кодексининг 354-моддасида фуқаролар ва юридик шахслар шартнома тузишда эркин экани белгиланган.

Coscom МЧЖ ХК муассислари уларга тегишли улушни Давлат рақобат қўмитасига сотишга қарор қилгани ҳисобга олиб, Coscom МЧЖ ХК устав капиталидаги улуш олди-бердиси тўғрисидаги шартнома томонларнинг ўзаро келишуви бўйича тузилди.

— Шартнома суммаси қандай аниқланади ва унга нималар киради?

— Ўзбекистон хусусийлаштирилган корхоналарга кўмаклашиш ва рақобатни ривожлантириш давлат қўмитаси Coscom МЧЖ ХКдаги 100 фоизлик улушни 215 миллион АҚШ долларига сотиб олди.

Шартнома суммаси сотувчилар томонидан аниқланди ва таклиф қилиниб, қўмита томонидан қабул қилинди, унинг таркибига Coscom МЧЖ ХК активлари ва пассивлари киради.

— Ucell мобил операторининг келгуси тақдири қандай бўлади? Компания яқин вақтларда хусусийлаштириладими? Агарда хусусийлаштирилса, қандай шартлар асосида амалга оширилади?

— Қонунчиликка мувофиқ, хусусийлаштириш масаласи ташаббускор томонидан белгиланган тартибда ариза берилган тақдирда кўриб чиқилади. Бироқ айни вақтда талабномалар йўқ.

Давлат улушини сотиш муддатлари ва шартларини сотувчи белгилайди. Ўзбекистон президенти, Вазирлар Маҳкамаси қарори билан бошқа муддат ва шартлар ўрнатилиши мумкин.