«Дарё» нашрига Бухоро вилояти Вобкент тумани «Ўзбакон» маҳалласида яшовчи фуқаролардан хат келиб тушди. Унда Аму Бухоро канали устида жойлашган кўприкнинг ҳолати ҳақида айтилади.
Илова қилинган суратларда кўприкнинг ўртароғида бетон ётқизманинг бир чети ораси очилиб, кўтарилиб қолганини, иккинчи бетон билан туташган жой емирилиб, кўприк устида катта-катта тешиклар пайдо бўлганини кўриш мумкин.
«Канал доимий тўлиб оқади. Мақсадимиз — одам тўла автобус кўприк синиши оқибатида сувга ғарқ бўлмасдан уни тузатиш. Бу жуда катта объект: мутахассис ва махсус техникаларсиз ҳашар йўли билан тузатиш имкони йўқ. Аммо бу ишда ким бош бўлиши керак, кўприкнинг эгаси ким, тополмаяпмиз. Мурожаат қилган ташкилотларимиз эса ҳолатни кўриб, ачиниб бу бизнинг қўлимиздан келмайди, дейишдан нарига ўтишмаяпти.
Бу анча аввал туширилган суратлар, ҳозирги аҳволи бундан-да баттар. Қандайдир ташкилот ходимлари (кимлигини ҳам билмаймиз) кўприкни тузатиш учун расмийлар диққатини шу ҳолатга жалб этиш ўрнига, кўприкдан ўтишни тақиқлашдан, тўсиқ қўйишдан нарига ўтишмаяпти. Халқ тўсиқни четга суриб барибир ўтади, кўприкдан ўтмасликнинг иложи йўқ. Чунки мактаб, боғча ва бошқа инфратузилма объектларига йўл шу ердан ўтган. Айланиб ўтиш 5—6 километр ошиқча масофани ташкил этади», — дейилади мурожаатда.
Изоҳ (0)