Бухорода чет корхонасини ўмарган шахсларга нисбатан қонуний чора кўрилди

Бухоро вилояти жиноят ишлари бўйича судида ўғирлик содир этган 4 кишига нисбатан ҳукм ўқилди. Бу ҳақда суд матбуот хизмати «Дарё» га хабар берди.

Қоракўл туманида яшовчи фуқаролар Ж.Раҳмонов, Ў.Аҳмедов, У.Шодмонов ва А.Ҳожиевлар Корея Республикасининг «Донг Сеунг Кореа» МЧЖ томонидан қурилиш ишлари олиб борилаётган Қоракўл туманидаги «Ҳарбий шаҳарча»да қоровул бўлиб ишлаб келиб, ўзаро олдиндан жиноий тил бириктирган ҳолда хизмат вазифасини бажараётган бир кечада МЧЖга тегишли бўлган жами баҳоси 23 496 240 сўмлик қурилиш материалларини ўғирлаб олиб, ўзга шахсларга сотиб юборади.

Ички ишлар бўлими ходимларининг саъй-ҳаракатлари билан жиноят тезда фош этилиб, тергов ва суд жараёнидачет эл корхонасига етказилган зарар тўлиқ ундирилди. Фуқаролар Ж.Раҳмонов, Ў.Аҳмедов, У.Шодмонов ва А.Ҳожиевлар Жиноят ишлари бўйича Қоракўл туман суди томонидан Ўзбекистон Республикаси Жиноят кодексининг 169-моддаси (ўғрилик) билан айбдор деб топилиб, уларнинг бири 2 йил муддатда ахлоқ тузатиш ишлари жазосини ўтаб, ҳар ойлик иш ҳақининг 20 % ни давлат даромади ҳисобига тўлайдиган бўлди.