Сурхондарё вилоятида шу бугунга қадар суд қарорига асосан 70 дан ортиқ алимент қарздорлигини тўламаган фуқароларга нисбатан 15 сутка маъмурий қамоқ жазоси қўлланилди. Бу ҳақда Мажбурий ижро бюроси Сурхондарё вилоят бошқармаси «Дарё»га маълум қилди.
Шу билан бирга йиллар давомида тўланмай келинаётган алимент қарздорликлари ҳам бартараф этилмоқда.
Мисол учун, суд буйруғига асосан Шўрчи туманида яшовчи А.Ҳайдаровдан унинг собиқ турмуш ўртоғи Ф.Ҳожиеванинг фойдасига 3 нафар фарзандларининг моддий таъминоти учун иш ҳақи ва барча даромадларининг ½ қисми миқдорида алимент ундириш белгиланган бўлиб, ўз мажбуриятини унутган А.Ҳайдаров алиментни йиллар давомида тўламаслиги оқибатида жами қарздорлиги 31 957 835 сўмга бориб етади.
Бюронинг Шўрчи тумани бўлими ходимлари томонидан унга нисбатан янги таҳрирдаги қонун талаблари ва маъмурий жазо қўлланилишини белгилаш учун иши судда кўриб чиқилиши тушунтирилиши натижасида А.Ҳайдаров алимент қарздорлигини тўлиқ бартараф этди.
Таъкидланишича, алимент соҳасидаги қонунчиликка киритилган ўзгартиришларга кўра алимент тўлашга мажбур шахслар томонидан икки ойдан ортиқ муддатда белгиланган қарздорликни тўламанмаслиги 15 сутка муддатга маъмурий қамоққа олинишига сабаб бўлиши ва маъмурий қамоқ жазоси қўлланилгандан сўнг ҳолат такрорланса, жиноий жавобгарликка тортилишига олиб келиши қонунчиликда белгилаб қўйилган.
Изоҳ (0)