Ўзбекистонда жорий йил бошидан буён мажбурий меҳнат масаласида ҳуқуқбузарликларга йўл қўйган шахсларга нисбатан қонунда белгиланган тартибда чоралар кўрилган. Бу ҳақда «Халқ сўзи» хабар берди.
Жумладан, 169 нафар сектор раҳбари — туман ва шаҳар ҳокимлари, прокуратура, ички ишлар ва давлат солиқ хизмати органлари раҳбарлари интизомий жавобгарликка тортилган. Уларнинг 30 нафари эгаллаб турган лавозимидан озод этилган.
Бу рақамлар Олий Мажлис Сенатининг Фан, таълим ва соғлиқни сақлаш масалалари қўмитаси, Қонунчилик палатасининг Меҳнат ва ижтимоий масалалар қўмитаси ҳамда Фуқароларнинг кафолатланган меҳнат ҳуқуқларини таъминлаш масалалари бўйича Парламент комиссиясининг қўшма мажлисида айтиб ўтилди. Шунингдек, унда Халқаро меҳнат ташкилотининг «Мажбурий меҳнат тўғрисида»ги ҳамда «Мажбурий меҳнатни тугатиш тўғрисида»ги конвенцияларининг мамлакатда ижро этилиши ҳолатини ўрганиш натижалари муҳокама қилинди.
Мажлисда бир қатор ҳуқуқбузарлик ҳолатлари аниқ мисоллар билан келтирилди. Хусусан, Навоий вилояти Хатирчи туманидаги 83- умумий ўрта таълим мактаби директори М. Мавлонов томонидан мактаб ўқитувчилари ўз розилигисиз ободонлаштириш ишларига жалб қилинган. Жиззах вилояти Зафаробод тумани ҳокимлиги томонидан тумандаги 4 та касб-ҳунар коллежи раҳбарлари «Обод қишлоқ» дастури доирасида ҳудудларга бириктирилиб, аҳоли хонадонларини бузиш, таъмирлаш ва қайта қуриш ишларига жалб қилингани кузатилган.
— Мажбурий меҳнатга директор ўз хоҳиши билан қўли остидаги ходимларни жалб қилмайди, — дейди Халқ таълими вазири Шерзод Шерматов. — У туман миқёсида иш олиб бораётган раҳбарларнинг оғзаки топшириқлари асосида шу ишга қўл уради. Масаланинг асл сабабларини ўрганишимиз керак. Аввало, ҳудудий кесимда иш олиб бораётган раҳбарларнинг бу борадаги масъулияти ва ҳуқуқий билимларини ошириш лозим.
Изоҳ (0)