6 декабрь куни соат 12:00 ларда Наманган шаҳри ва Мингбулоқ, Тўрақўрғон, Уйчи ҳамда Чортоқ туманларида кучли гумбурлаш овозлари эшитилган, деб ёзади Turon24.
Ижтимоий тармоқларда тарқалган Намангандаги автомобилларга газ қуйиш шохобчаларидан бирида портлаш содир бўлгани ҳақидаги хабарлар ўз тасдиғини топмади. Аксинча, гумбурлаш овозлари Мингбулоқда нефть қидириш ишлари билан боғлиқ экани маълум бўлди. Бу ҳақда Наманган шаҳар истеъмолчилар ҳуқуқларини ҳимоя қилиш жамияти раиси Ҳусанбой Алиев маълум қилди.
– Автомобильларга газ қуйиш шохобчаларидаги нархлар борасида доимий мониторинг юритаётганимиз учун бу хабарга ойдинлик киритиш қийинчилик туғдирмади. Мингбулоқ туманида бурғулаш ишлари олиб борилаётган ҳудудда портлаш рўй бергани ҳақидаги тахминимиз тўғри чиқди. Ишчи гуруҳ билан биргаликда ушбу туманга бориб, воқеа жойини кузатиш натижасида ҳақиқатан ҳам нефть сизиб чиққанлиги аниқланди. Мутасаддилар суҳбат давомида мазкур ҳудуддан нефть чиққанини тасдиқлаб, тегишли ишлар олиб борилаётганини таъкидлади. Бироқ ҳозир қанча миқдорда нефть чиққани ва кўлами ҳақида расмий маълумот олишнинг имкони бўлмади, – дейди Ҳусанбой Алиев.
Туман ҳокимлиги қабулхонасидаги исмини очиқлашни истамаган манба ҳам буни тасдиқлади ва мазкур ҳолат туманнинг Чордона маҳалласи ҳудудида рўй берганини билдирди. Айни вақтда ҳудуд хавфсизлик нуқтаи назаридан ўраб олинган ва фуқаролар кириши чекланган.
«Мингбулоқнефть» Ўзбекистон-Хитой қўшма корхонаси томонидан амалга оширилаётган «Мингбулоқ конида қидирув ва қазиб олиш» лойиҳаси доирасида 4 та қидирув-бурғулаш қудуғи ишга туширилади ва 4 та мавжуд қудуқ капитал таъмирланади. Бош пудратчи – Xibu Duolling Engineering компанияси бурғулаш майдони ва вахта қароргоҳидаги тайёргарлик ишларини якунига етказган. M15 қидирув қудуғи ишга туширилган. Қудуқда бурғулаш ишлари катта – 6 минг метргача чуқурлик, аномал босим – 1200 атмосфера босими ва коллекторларнинг геологик мураккаб тузилиши шароитида олиб борилиши энг замонавий муҳандислик ечимларини тақозо этади.
25 йилга мўлжалланган ва умумий қиймати 255 миллион доллардан ортиқ бўлган ушбу лойиҳа натижасида Мингбулоқ нефть конидан йилига 200 минг тонна суюқ углеводород қазиб олиш режалаштирилган.
Изоҳ (0)