6 декабрь куни «Мажбурий меҳнат тўғрисида»ги ҳамда «Мажбурий меҳнатни тугатиш тўғрисида»ги конвенцияларининг ижро этилиши ҳолатини ўрганиш натижаларига бағишланган қўшма мажлис бўлиб ўтди, деб ёзади Spot.
Мажлисда муҳокама қилинган масала юзасидан Фуқароларнинг кафолатланган меҳнат ҳуқуқларини таъминлаш масалалари бўйича Парламент комиссиясининг қўшма қарори қабул қилинди.
Хабарга кўра, мажбурий меҳнатнинг ҳар қандай шаклларини ўз вақтида аниқлаш ва уларга барҳам бериш мақсадида давлат органларида қайта алоқа механизмларининг замонавий усуллари жорий этилган.
«Агар илгари пахта йиғим терими мажбурий меҳнатдан фойдаланишнинг турли шакллари намоён бўладиган жараён сифатида қайд этилган бўлса, эндиликда, аксинча, бу мавсум фуқаролар, айниқса, ёшларнинг меҳнат ҳуқуқларини рўёбга чиқариш, ишга лаёқатли аҳолининг бандлигини таъминлаш ва фуқаролар даромадларини оширишнинг манбаига айланмоқда», дейилади хабарда.
Таъкидланишича, бу борада жойларда теримчиларнинг моддий манфаатдорлигини таъминлаш ҳамда пахта етиштирувчи хўжаликларнинг молиявий ҳолатини янада мустаҳкамлаш чоралари кўрилган. Пахта хом ашёсининг қўлда терилган бир килограмми учун 650 сўмдан 1000 сўмгача, иш кучи етишмайдиган ҳудудларда, хусусан Жиззах, Сирдарё, Тошкент вилоятларида ҳамда Қашқадарё ва Сурхондарё вилоятларининг айрим туманларида 1300 сўмгача меҳнат ҳақи тўланган.
Ёшлар иттифоқи томонидан пахта йиғим-теримида уюшмаган ёшларни вақтинчалик меҳнат билан банд қилиш, уларни моддий қўллаб-қувватлашга қаратилган 190 та «Фидойи ёшлар отряди» ташкил этилиб, 32568 нафар теримчи жалб қилинган. Мавсумий ишларга жалб этилган 28 552 нафар йигит-қизнинг вақтинчалик фаолияти меҳнат стажи сифатида инобатга олиниб, ҳуқуқий жиҳатдан мустаҳкамлаб қўйилган.
Соҳадаги муносабатларни тартибга солиш мақсадида ҳуқуқбузарликларга йўл қўйган шахсларга нисбатан мансаб лавозимидан қатъи назар қонунда белгиланган тартибда чоралар кўрилди. Хусусан, 169 нафар ижтимоий-иқтисодий ривожланиш комплекси бўйича сектор раҳбари (туман ва шаҳар ҳокимлари, прокуратура, ички ишлар ва давлат солиқ хизмати органлари раҳбарлари) интизомий жавобгарликка тортилган, уларнинг 30 нафари эгаллаб турган лавозимидан озод этилган.
Изоҳ (0)