Тошкент шаҳар божхона бошқармаси ходимлари томонидан «Келес» темир йўл станциясига кириб келган «Москва—Тошкент» йўналишидаги халқаро қатнов поездини божхона назоратидан ўтказиш давомида Ўзбекистонга сифати кафолатланмаган маҳсулотларни ноқонуний тарзда кириб келишининг олди олинди. Бу ҳақда «Дарё»га Божхона қўмитаси ахборот хизмати маълум қилди.
Назорат давомида фуқаро Т.У.нинг белгиланган божхона қонунчилигига риоя этмасдан товар-моддий бойликларини Ўзбекистонга олиб кираётганлиги маълум бўлди.
Қоидабузар умумий қиймати қарийб 76 миллион сўмлик пишлоқ, дудланган балиқ, болалар озуқаси каби сифати кафолатланмаган маҳсулотларни ноқонуний равишда вагоннинг йўловчилар учун мўлжалланган ўриндиқлари остига яширган ҳолда олиб кирмоқчи бўлган экан.
Ҳозирда юқорида кўрсатиб ўтилган товар-моддий бойликлар ҳуқуқбузарлик ашёси сифатида олиб қўйилиб, ҳолат юзасидан текширув ҳаракатлари давом эттирилмоқда.
Изоҳ (0)