3 декабрь — ногиронлиги бўлган шахслар халқаро куни муносабати билан вилоят ҳокимлиги томонидан белгиланган чора-тадбирларга мувофиқ, вилоят соғлиқни сақлаш бошқармаси томонидан Самарқанд шаҳридаги «Саховат» кексалар ва ногиронлар учун интернат уйида истиқомат қилаётган якка-ёлғизлар ва ногиронлар учун байрам тадбири бўлиб ўтди. Бу ҳақда «Дарё» мухбири Фарҳод Норбўтаев хабар бермоқда.
Тадбирда сўзга чиққанлар мамлакатда кексаларга қаратилаётган эътибор, уларга яратиб берилаётган шарт-шароитлар ҳақида сўз юритиб, байрам иштирокчиларини байрам билан табриклади. Тадбир давомида «Саховат» уйида яшаётган кексаларга байрам совғалари улашилди.
– Бугунги кунда мазкур интернат уйида 131 нафар давлат томонидан муҳофазага олинган кексалар истиқомат қилиб келмоқда. Уларнинг 78 нафари ётоқ режимидаги беморлар ҳисобланади. Саховат уйида кексалар йилда икки маротаба чуқурлаштирилган тиббий кўрикдан ўтказилмоқда. Тиббий кўрик натижаларига қараб беморлар стационар ва амбулатор тарзда даволанмоқда, – дейди «Саховат» уйи шифокори Икром Ғуломов.
Ногиронлар халқаро куни муносабати билан вилоят соғлиқни сақлаш бошқармаси томонидан қатор тадбирлар ўтказилиб, ижтимоий муҳофаза муассасаларида чуқурлаштирилган тиббий текширувлар билан бирга вилоят касаба уюшмалари ташкилотлари бирлашмаси, «Маҳалла» жамоат фонди ва «Нуроний» жамғармаси вилоят бўлимлари ҳамда ҳомийлар кўмагида байрам дастурхонлари, концерт дастурлари ташкил этилди.
– 17 йилдан буён шу ерда яшаб келаман. Ҳар байрамда бизни тўкин дастурхон атрофида йиғиб турли хил совға-саломлар улашишади дейди, – Ҳилола Раззоқова. – Муассаса ходимлари бизлар учун барча шароитларни яратиб берган. Менинг бир қўлим ишламаса-да, бир қўл билан кашта тикаман. Бундай эътибор ва ғамхўрлик учун барча ташкилотчиларга миннатдорчилик билдираман.
Изоҳ (0)