Қашқадарё вилоятида жорий йилнинг 10 ойида 899 та ёнғин қайд этилди. Уларнинг оқибатида 7 нафар фуқаро ҳалок бўлди, 51 киши тан жароҳати олди, дея хабар беради ЎзА.
— Аксарият ҳолларда ёнғин чиқишига эътиборсизлик сабаб бўлади, — дейди вилоят ИИБ ЁХБ бошлиғи, полковник Фарҳод Мирзаев. — Мисол учун, жорий йил 8 август куни Шаҳрисабз тумани, Муғилтой қишлоғида яшовчи Тиркаш Равшановнинг (исм-шарифлар ўзгартирилган) ҳовлисидаги сомонхонада ёнғин содир бўлиб, сомонхонанинг том қисми ва ичидаги сомон ғарами ёниб кетган. Воқеа жойидан уй эгасининг 7 ёшли набирасининг куйган жасади топилди. Аниқланишича, ёнғин ўша қизалоқнинг сомонхонага кириб, гугурт ўйнаши оқибатида содир бўлган.
1 октябрь куни тахминан соат 01:45 ларда Қарши шаҳри, Наво маҳалласи, Янги дарвоза кўчасида яшовчи Шотўра Тойқараевнинг уйида ёнғин чиқиб, хонадон эгасининг бевақт ўлимига сабаб бўлди. Мазкур ёнғинга марҳумнинг маст ҳолда сигарет чекиб, ухлаб қолиши сабаб бўлган.
Таҳлилларга кўра, бу каби нохуш ҳолатларнинг 70 фоизи аҳоли турар жойларига тўғри келмоқда ва бунда газ ҳамда электр билан боғлиқ нохуш ҳолатларнинг ҳам ҳиссаси бор. аҳолининг носоз иситиш қурилмаларидан фойдаланиши оқибатида ис газидан заҳарланиш ҳолатлари ҳам учраб турибди. Жумладан, жорий йил 4 ноябрь куни Шаҳрисабз тумани Тўдамайдон маҳалласида яшовчи Б.К. ис газидан заҳарланиб, воқеа жойида вафот этди.
Изоҳ (0)