Шаҳзода Гарри Британия қироллик оиласининг энг оммабоп аъзоси бўлди

Тахт учун навбатда олтинчи бўлган Британия шаҳзодаси Гарри қироллик оиласининг энг энг оммабоп аъзоси ҳисобланади, деб ёзади «Коммерсантъ».

У нафақат отаси — валиаҳд шаҳзода Чарльзни, балки бувиси — ҳукмрон қиролича Елизавета II ни ҳам ортда қолдирди.

YouGov компанияси ўтказган сўров натижаларига кўра, британияликларнинг 77 фоизи 34 ёшли Сассекс герцоги шаҳзода Гаррини ёқимтой деб ҳисоблайди. Улар шаҳзодани «мафтункор», «ёқимтой», «ҳазилкаш», «қувноқ» сифатлари билан таърифлади.

Қиролича Елизавета II 74 фоиз овоз билан рейтингнинг иккинчи поғонасида жойлашди. Тахтга навбатда учинчи бўлган Кембридж герцоги Уильям 73 фоиз овоз тўплади. Бўлажак қирол — шаҳзода Чарльзга эса сўров иштирокчиларининг 48 фоизи овоз берди. У нафақат келинлари Кембридж герцогиняси Кэтрин (64 фоиз) ва Сассекс герцогиняси Меган (55 фоиз)дан, балки ўз отаси Эдинбург герцоги Филипп (56 фоиз)дан ҳам ортда қолиб кетди. Шаҳзода Чарльзнинг рафиқаси — Корнуолл герцогиняси Камилла оммабоплик рейтингида ундан ҳам паст ўринни эгаллади (29 фоиз).