Самарқанд вилояти ИИБ тергов суриштирув ходимларига ҳодиса содир бўлган жойда тезкорлик билан ашёвий далилларни олиш ва ҳужжатларни сифатли расмийлаштириш мақсадида «Тергов портфели» ва анжомлари ҳамда «Терговчи» ёзуви туширилган камзуллар тақдим этилди. Бу ҳақда «Дарё» мухбири Фарҳод Норбўтаев хабар бермоқда.
Қолаверса, ходимлар 60 та замонавий компьютер жамланмалари билан таъминланиб, барча зарур жиҳозларга эга Damas русумли сайёр тергов ва суриштирув ўтказиш махсус автомашинаси топширилди.
Самарқанд вилоят ички ишлар бошқармаси ҳузуридаги тергов бошқармаси ва унинг қуйи тизимлари томонидан ўтган 10 ой давомида бир қатор ижобий ишлар амалга оширилди. Хусусан, тергов бошқармасида терговга чақирилган фуқароларнинг ҳуқуқ ва қонуний манфаатларини таъминлаган ҳолда халқаро стандартларга тўла жавоб берадиган вояга етмаган шахсларни сўроқ қилиш ҳамда масофадан туриб, тергов ҳаракатларини ўтказиш имкониятига эга бўлган «махсус тергов хонаси» ташкил этилди.
«Суриштирувчи ва терговчилар томонидан жиноят ишлари бўйича маълумотларни тезкорлик билан олиш, олис масофалардан вилоят марказига келиб, ортиқча оворагарчиликларни олдини олиш мақсадида барча хизмат компьютерларига«АИБ-Ўзбекистон» маълумотлар жамланмаси ўрнатилиб, ходимлар ўз хизмат хонасидан туриб зарур маълумотларни олиш имкониятига эга бўлди», — дейди Самарқанд вилоят ИИБ матбуот хизмати раҳбари Ширин Норматова.
Изоҳ (0)