«Ўзагротехсаноатхолдинг» АЖ тизимидаги Ўзбекистон-Корея қишлоқ хўжалиги техникалар конструкторлик технологик маркази ёш мутахассислари томонидан универсал трактор тиркамаси ишлаб чиқилди. Бу ҳақда АЖ матбуот хизмати «Дарё»га маълум қилди.
«Ўзагротехсаноатхолдинг» компанияси раиси М.А.Каримовнинг ғояси асосида ишлаб чиқилган ушбу трактор тиркамасининг афзаллиги шундан иборатки, бу тиркамага нафакат қишлоқ хўжалиги маҳсулотларини юклаш, балки ундан мавсум давомида фермер хўжаликларининг ишчи ходимларини ташиш, махсус штаб сифатида фойдаланиш, шу билан бирга, дала шароитида яшаш учун кўчма уй сифатида ҳам фойдаланиш мумкин.
Тиркама 24 кишини ташиш имконига эга, юк кўтарувчанлиги 4 тонна, платформанинг габарит ўлчамлари 6500×2500×2400 мм, барча ғидиракларига тормоз тизими ўрнатилган, тўхтаб туриш тормози, электр ёритиш жиҳозлари билан тўлиқ жиҳозланган. Одам ташиш вақтида уларнинг хавфсизлини таъминлаш учун тиркаманинг дастлаб 3D варианти лойиҳаланиб, уни тўлиқ таҳлил қилиб текшириб кўрилган.
Универсал трактор тиркамасини лойиҳалашда марказ бош директори Ш.А.Аҳмедов, етакчи мутахассислар К.Д.Бегматов, М.Р.Ботиров, А.Х.Муслимов, М.Жуманиёзов ва ТГТУ магистрати А.А.Акбаралиевлар фаол иштирок этди. Лойиҳани амалга оширишда «Тошкент қишлоқ хўжалиги машиналари заводи» АЖ бош муҳандиси В.А.Козинский ва завод цехлари яқиндан кўмаклашди.
Бугунги кунда мазкур тиркамани давлат синовлардан ўтказиш ишлари олиб борилмоқда.
Изоҳ (0)