Қаршида 2019 йили оммавий ахборот воситалари музейи ташкил этилади. Бу ҳақда қашқадарёлик кекса журналистлар билан бўлган мулоқотда маълум қилинди, дея хабар беради «Turon 24».
Мулоқотда вилоят ҳокимининг топшириғига кўра 2019 йилда Қарши шаҳрида ёзувчи ва журналистлар учун кўп қаватли уйлар қурилиши айтилди.
Ўзбекистон журналистлари ижодий уюшмаси вилоят бўлими ташаббуси билан ташкил этилган давра суҳбатига кекса, ногирон ва бугунги кунда кўмакка муҳтож устоз журналистлар таклиф этилиб, ҳар бирига озиқ-овқат маҳсулотлари совға қилинди.
«Вилоятда бугунги кунда 500 га яқин журналист фаолият юритмоқда, шундан 50 нафари кекса журналистлар, — дейди уюшма вилоят бўлими раиси Галовуддин Йўлдошев. — Ташкилотимиз 2018 йилнинг бошидан буён ҳар чоракда уcтозларни йўқлаб, уларнинг кўнглини кўтариш мақсадида давра суҳбати ташкил этишни йўлга қўйган. Мулоқот давомида улар ёш журналистларга маҳорат сирларидан сабоқ беради. Шунингдек, ОАВ ходимларини қийнаётган муаммолар ва уларга ечим топиш бўйича муҳокама ўтказилади, янги таклифлар ўртага ташланади».
Галовиддин Йўлдошевнинг сўзларига кўра, ОАВ музейини ташкил этиш ва ижод аҳли учун янги уйлар қуриб бериш таклифи ҳам мана шу мулоқотлар чоғида айтилган. Бу таклифларни кейинчалик ҳокимлик ва мутасадди ташкилотлар маъқуллаган.
«Илгари журналистлар уюшмасининг аъзоси деган гувоҳнома ва кўкрак нишони бериларди, — дейди кекса журналист Юсуф Норов. — Ана шу амалиётни тиклаш керак. Соҳага кириб келаётган ҳар бир журналистга уюшманинг аъзолик гувоҳномаси ва кўкрак нишони топширилса, унда масъулият, ишончни оқлаш, муносиб бўлиш ҳисси кучаяди».
Изоҳ (0)