Айни кунларда Адлия вазирлиги томонидан ташкил этилган «Биз коррупцияга қаршимиз» мегатанлови доирасида ўтказилаётган «Коррупция – тараққиёт кушандаси» умуммиллий иншолар танлови ўзининг қизғин палласига кирди, деб хабар берди Адлия вазирлиги матбуот хизмати.
Маълумки, иншолар танлови бошқа номинациялардан фарқли равишда онлайн тарзда ўтказилмаяпти. Яъни, иштирокчилар иншоларни ўзлари қўлда ёзиб, шахсан ҳайъатга топшириши керак.
Иншолар танловининг 20 октябрь куни якунланган 1-босқичида бутун республика бўйлаб 20 мингдан ортиқ ижодий ишлар топширилди. Улар ҳар бир туман адлия бўлимлари қошида ташкил этилган ҳакамлар ҳайъати томонидан баҳоланди, 30 октябргача ғолиблар эълон қилинди ва 1000 нафар иштирокчига иккинчи босқичда қатнашиш учун йўлланма берилди.
Бугун, 15 ноябрь куни ҳудудий адлия органлари томонидан ўтказилган 2-босқич ҳам якунланади ва иншоларни баҳолаш жараёни бошланади.
Иштирокчилар маълум бинога белгиланган вақтда тўпланиб, «Коррупция ва жамият» мавзусида иншолар ёзди.
Кузатувчилар иштирокчиларнинг мавзуни ёритишга жиддий киришганлари, тарихий ва халқаро тажрибани ҳамда замонавий воқеликни ҳисобга олган ҳолда чуқур таҳлилий иншолар ёзишга ҳаракат қилаётганларини таъкидламоқда.
Эслатиб ўтамиз, иншолар танлови уч босқичда, икки йўналишда (ўқувчилар ва талабалар) бўлиб ўтади. Учинчи босқич республика даражасида ўтказилади ва унда ҳар бир вилоятдан ҳар йўналишдан 3 нафардан ғолиб иштирок этиши мумкин.
Танлов якунлари Конституция куни ҳамда Халқаро коррупцияга қарши кураш куни арафасида эълон қилинади.
Иншолар танлови ғолибларига ҳар бир йўналиш бўйича 1 тадан Samsung Galaxy S9 смартфони ҳамда бошқа қимматбаҳо совғалар топширилади.
Изоҳ (0)