13 ноябрь ОАВ ва ижтимоий тармоқларда Андижон вилояти ҳокимининг жорий йил ноябрь ва декабрь ойларини вилоятда «маънавият ойи» деб эълон қилган қарори тарқалди, деб хабар беради Меҳнат вазирлиги ахборот хизмати.
Ҳокимнинг тегишли буйруғига мувофиқ, шу йилнинг ноябрь ойи иккинчи ўн кунлигида Андижон вилоятида хайрия ҳашарини ўтказиш режалаштирилмоқда.
Маълум қилинишича, ҳашар муносабати билан ҳудуддаги барча давлат ва нодавлат ташкилотлар ходимларининг бир кунлик маоши ихтиёрий асосда вилоят ҳокимиятининг махсус ҳисоб рақамига ўтказилади.
Ўзбекистон Республикаси Бандлик ва меҳнат муносабатлари вазирлиги шуни маълум қиладики, Ўзбекистон Республикаси Вазирлар Маҳкамасининг 2018 йил 10 майдаги «Ўзбекистон Республикасида мажбурий меҳнатга барҳам беришга доир қўшимча чора-тадбирлар тўғрисида»ги 349-сон қарорига мувофиқ, давлат органлари ва бошқа ташкилотлар томонидан ҳашарлар қуйидаги шартларга қатъий риоя этилган ҳолда фақат ихтиёрий тарзда ташкил этилади ва ўтказилади:
– умумхалқ ҳашарини ўтказиш тўғрисида фақат Ўзбекистон Республикаси Президентининг тегишли ҳужжати ёки Ўзбекистон Республикаси Вазирлар Маҳкамасининг қарори мавжуд бўлганда;
– ҳашарлар унда иштирок этадиган шахслар меҳнат қиладиган тегишли ташкилот ҳудудида меҳнатни муҳофаза қилиш ва хавфсизлик нормаларига қатъий риоя этилган ҳолда ўтказилади;
– ҳашарлар доирасида барча бошқа турдаги жамоат ишлари, шу жумладан, қурилиш-таъмирлаш ва қишлоқ хўжалиги ишларига мажбурий жалб этишга қатъий йўл қўйилмаган ҳолда ободонлаштириш, кўкаламзорлаштириш, иш ўринларини тартибга келтириш ишлари амалга оширилади.
Андижон вилояти ҳокимига Давлат меҳнат ҳуқуқ инспекциясининг кўрсатмаси юборилди:
– Андижон вилояти ҳокимининг 2018 йил 7 ноябрдаги 207-Ф сонли буйруғини қонунчиликка мувофиқлаштириш тўғрисида;
– ҳашарни ўтказиш жараёнида Ўзбекистон Республикаси Вазирлар Маҳкамасининг 2018 йил 10 майдаги «Ўзбекистон Республикасида мажбурий меҳнатга барҳам беришга доир қўшимча чора-тадбирлар тўғрисида»ги 349-сон қарори ва амалдаги қонунчилик талабларига амал қилиш зарурлигини инобатга олиш;
– ўн кун муддатда кўрилган чора-тадбирлар тўғрисидаги маълумотларни Давлат меҳнат ҳуқуқ инспекциясига тақдим этиш.
Эслатиб ўтамиз, меҳнатга мажбурий жалб қилиш ҳолатлари кузатилганда мурожаат қилиш учун Бандлик ва меҳнат муносабатлари вазирлигининг +998 71 200 06 02 рақамлари ва @mehnathuquqbot Telegram бот ишонч тармоқлари фаолият кўрсатмоқда.
Изоҳ (0)