Тошкентда Болалар кўп тармоқли тиббиёт марказининг қурилиши жадаллик билан олиб борилмоқда. Ушбу мажмуа 2020 йилда фойдаланишга топширилиши кўзда тутилган. Ўзбекистон Соғлиқни сақлаш вазирлиги ахборот хизматидан маълум қилишларича, Жанубий Корея иқтисодий ривожланиш ва ҳамкорлик фонди (EDCF) билан биргаликда амалга оширилаётган ушбу лойиҳанинг умумий қиймати 130,5 миллион долларни ташкил этади.
Айни пайтда тиббиёт марказининг қурилиши ва жиҳозланиши билан бир қаторда, марказда ишлайдиган кадрлар малакасини ошириш бўйича ҳам қўшма лойиҳалар амалга оширилмоқда. Хусусан, Ўзбекистон Соғлиқни сақлаш вазирлиги ва Жанубий Кореянинг Янгсан Пусан миллий университети ўртасидаги ҳамкорлик шартномасига мувофиқ, 100 нафар ўзбекистонлик мутахассис малака ошириши режалаштирилган.
Номзодлар малака-маҳорати, хорижий тилларни билиши, жаҳон тиббиётининг энг илғор янгиликларини ўзлаштириш салоҳиятига қараб танлов асосида саралаб олинмоқда. Шифокорларнинг дастлабки 19 нафари саралаш жараёнидан муваффақиятли ўтиб, бир йил мобайнида Янгсан Пусан миллий университетида таҳсил оладиган бўлди.
Сафар олдидан улар билан соғлиқни сақлаш вазири Алишер Шодмонов учрашиб, бир йиллик таҳсилни муваффақиятли якунлаб, малакали кадрлар бўлиб етишишларида омад ва муваффақият тилади. «Ўз навбатида, ёшлар ҳам вақтнинг ҳар лаҳзасидан оқилона фойдаланишга, ўзларига билдирилган ишончни оқлаб, тиббиётимизнинг эртанги тараққиётига муносиб улуш қўшишга ваъда бердилар», — дейилади вазирлик ахборотида.
Бунёд этилаётган марказ лойиҳаси Жанубий Корея ва жаҳон тиббиёти андозалари асосида ишлаб чиқилган бўлиб, бинонинг қурилиш, хавфсизлик тизими, иситиш, совутиш тармоқлари жаҳон стандартлари талабларига жавоб беради. Янги тиббиёт муассасаси 280 ўринга мўлжалланган бўлиб, клиникада кунига 250 беморни қабул қилиш ва йилига 1500 дан кўпроқ мураккаб операциялар ўтказиш имконияти яратилади.
Болалар кўп тармоқли тиббиёт марказига 381 номдаги замонавий тиббий асбоб-ускуналар, шу жумладан, ангиограф, компьютер тамограф, юқори технологияли рақамли рентген ва флюороскопик тизими, мобил рентген аппарати, циклотрон каби инновацион тиббий жиҳозлар ўрнатилиши кўзда тутилган.
Изоҳ (0)