Самарқанд вилоят Ички ишлар бошқармаси Йўл ҳаракати хавфсизлиги бошқармаси ходимлари томонидан Ўзбекистон Республикаси Вазирлар Маҳкамасининг «Йўл ҳаракати хавфсизлиги кунини ўтказиш ва йўл транспорт ҳодисалари профилактикасининг самарадорлигини ошириш чора-тадбирлари тўғрисида»ги қарори асосида «Йўл ҳаракати хавфсизлиги тарғибот куни» тадбири ўтказилди. Бу ҳақда «Дарё» мухбири Фарҳод Норбўтаев хабар берди.
Профилактик тадбир доирасида ҳайдовчилар томонидан 1 523 та қоидабузарлик аниқланди. Қайд этилган қоидабузарликларнинг 577 таси қўпол қоидабузарлик, 150 та транспорт воситасини маст ҳолатда бошқариш, 26 та ҳолатда светофор ва чорраҳалардан ўтиш қоидасини бузиш, 16 та ҳолатда транспорт воситасини бошқариш вақтида телефондан фойдаланиш, 384 та ҳолатда хавфсизлик камаридан фойдаланмаслик, 100 та ҳолатда пиёдалар томонидан содир этилган қоидабузарликларга қонуний чоралар кўрилди.
Вилоят ички ишлар бошқармаси матбуот хизматининг маълум қилишича, тадбирга 1 119 нафар ички ишлар ходими жалб этилган. Шундан 296 нафари Давлат йўл ҳаракат хавфсизлиги хизмати, 431 нафари ҳуқуқбузарликлар профилактикаси хизмати, 61 нафари Пост-патруль хизмати (ППХ) ва Жамоат тартибини сақлаш бошқармаси (ЖЦБ), 89 нафари ёнғин хавфсизлиги, 100 нафари қўриқлаш хизмати, 142 нафар бошқа соҳавий хизматлар ходимлари иштирок этган. Шунингдек, 1 821 нафар ҳокимликлар, идора ва ташкилотлардан жамоатчилик вакиллари жалб этилган.
Тадбир давомида 146 километр пиёдалар йўлаклари ва болалар ҳаракати серқатнов бўлган йўллар кўрикдан ўтказилди. 114,5 километр йўл қайта таъмирланиб, 38 дона йўл белгиси ўрнатилди. Йўл белгилари юзасидан аниқланган камчиликлар бўйича тўққизта йўл ташкилоти, 17 та ҳудудий ҳокимликка тақдимномалар киритилди.
Профилактик тадбир давомида 56 та лицензиясиз ноқонуний фаолият юритиб келаётган автомобилларни таъмирлаш устахоналари аниқланиб, ҳудудий солиқ идораларига юборилди.
Изоҳ (0)