Туркия ва Ўзбекистон Соғлиқни сақлаш вазирликлари ҳамда Туркия ҳамкорлик ва мувофиқлаштириш агентлиги — TIKA ҳамкорлигида амалга оширилиятган Туркия — Ўзбекистон «Саломатлик ҳафталиги» шу йилнинг 3—9 ноябрь кунлари Қорақолпоғистон Республикасининг Нукус шаҳрида бўлиб ўтади. Бу ҳақда Ўзбекистон Соғлиқни сақлаш вазирлиги матбуот хизмати «Дарё»га маълум қилди.
Ўзбекистон ва туркиялик жами 38 шифокор иштирокида бўлиб ўтадиган акцияда пластик ва реконструктив жарроҳлик ҳамда гинекологик йўналишларда операциялар амалга оширилади. 2018 йил Термиз ва Тошкент шаҳарларида икки марта амалга оширилган «Саломатлик ҳафталиги»нинг учинчиси Нукус шаҳридаги Республика Педиатрия Тиббиёт маркази ва Онкалогия деспансирида бўлиб ўтади.
Акция учун керакли дори-дармон ва тиббиёт анжомлари Туркиядан келтирилган бўлиб, акция давомида Туркия ва Ўзбекистон Республикаси Соғлиқни сақлаш вазирлигининг тажрибали шифокорлари томонидан бепул тиббий хизмат кўрсатиш мақсад қилиб қўйилган.
7 кун давом этадиган акцияда 600 га яқин беморларни тиббий кўрикдан ўтказиш, 200 атрофида беморларни операция қилиш режалаштирилган. Шу билан бир қаторда оғир операцияларга эҳтиёжи бўлган беморларнинг барча харажатлари Туркия Республикаси Соғлиқни сақлаш вазирлиги ва TIKA томонида қопланган ҳолда Туркияда даволашларини таминлаш ҳам режалаштирилган.
Туркия ҳамкорлик ва мувофиқлаштириш агентлиги, Ўзбекистон ва Туркия Соғлиқни сақлаш вазирликлари ҳамкорлигида 2009—2017 йиллар давомида бундай акциялар Ўзбекистоннинг турли вилоятларида 11 маротаба ўтказилган бўлиб, бу акцияларда 3637 та 18 ёшгача бўлган болалар ва ўсмирлар тиббий кўрикдан ўтказилиб, 1049 таси бепул операция қилинган эди.
Изоҳ (0)