2019 йилнинг январь ойида Бирлашган Араб Амирликларида футбол бўйича 17-Осиё Кубоги бўлиб ўтади. Мусобақа 5 январдан 1 февралга қадар давом этади. Бугун эса мазкур мусобақа бошланишига 60 кун қолганда, ЎФА матбуот хизмати Ўзбекистон терма жамоасининг Осиё Кубокларидаги иштироки ҳақида маълумотлар билан бўлишди.
Навбатдаги Осиё Кубогида 24 та терма жамоа, шу жумладан, Ўзбекистон ҳам қатнашади. Осиё Кубоги БААнинг тўртта шаҳрида бўлиб ўтади: Абу-Даби, Дубай, Ал-Айн ва Шаржа.
Осиё Кубоги 1956 йилдан бошлаб ўтказиб келинади. Мусобақа тарихи давомида қуйидаги терма жамоалар Осиё Кубогини қўлга киритишган: Жанубий Корея, Исроил, Эрон, Кувайт, Саудия Арабистони, Япония, Ироқ ва Австралия. Осиё Кубогининг амалдаги соҳиби Австралия терма жамоаси ҳисобланади.
2019 йилдаги Осиё Кубоги Ўзбекистон миллий терма жамоаси учун ҳисоб бўйича еттинчиси бўлади. Мусобақадаги энг яхши натижага Ўзбекистон 2011 йилда эришган. Ўшанда терма жамоа 4-ўринни қўлга киритган. Осиё Кубогидан ўрин олган учрашувларда Ўзбекистон МTJ таркибида энг кўп гол киритган футболчи Александр Гейнрих ҳисобланади. Унинг ҳисобида жами 6 та гол бор.
Осиё Кубоги—2019 мусобақасида Ўзбекистон миллий терма жамоаси «F» гуруҳидан ўрин олган бўлиб, гуруҳда Уммон, Туркманистон ва Япония терма жамоалари ўрин олган.
Дастлабки баҳсни Ўзбекистон терма жамоаси 9 январь куни Шаржа шаҳрида Уммон терма жамоасига қарши ўтказади. 13 январь куни Дубайда Туркманистон терма жамоасига қарши майдонга тушилса, гуруҳдаги сўнгги ўйин 17 январь куни Ал-Айн шаҳрида Японияга қарши бўлиб ўтади.
Изоҳ (0)