Беларусь пойтахти Минск шаҳрида анъанавий «Листопад» XXV халқаро кинофестивали иш бошлади. Унда ўзбекистонлик актёр Рустам Саъдуллаев Беларусь президентининг махсус «Кино санъатида миллий қадриятларни сақлаш ва ривожлантиришдаги хизматлари учун» унвони билан тақдирланди. Бу ҳақда Turon24 хабар бермоқда.
Рустам Саъдуллаев ва Россия халқ артисти Светлана Немоляева фестивалнинг фахрий меҳмонлари сифатида иштирок этди.
Чорак асрдан буён ўтказиб келинаётган «Листопад» кинофестивалида бу йил 50 та мамлакатдан 170 та кинокартина тақдим этилди. Улар орасида Европа давлатларидан ташқари Жанубий Африка ва Кения фильмлари ҳам қатнашмоқда. Фестивальга жаҳон премьералари, ҳужжатли фильмлар, ҳаваскор фильмлар тақдим этилди.
Фестиваль очилиши маросими Минскдаги энг муҳташам «Москва» кинотеатрида ўтказилди. Фестивалда, шунингдек, модалар намойиши ҳам тақдим этилди. Фильмлар тақдимотини польшалик режиссёр Павел Павликовскийнинг «Совуқ уруш» картинаси очиб берди.
Фахрий меҳмонлар қаторида иштирок этган, «Ишдаги ишқ» фильми бош қаҳрамони актриса Светлана Немолаева фестиваль ташкилотчиларига миннатдорлик билдирди. «Мени «Листопад» билан айнан «Иш билан боғлиқ ишқ» боғлаб келмоқда», — деди у.
«Ғолибларни аниқлаш учун анча меҳнат қилишимизга тўғри келади. Чунки бу ерда кўплаб халқаро кинофестиваллар иштирокчиларининг фильмлари ҳам тақдим этилмоқда. Шунинг учун мен «Листопад»ни фестиваллар фестивали деб ҳисоблайман», — дея қайд этган ҳаваскор фильмлар ҳайъати раиси Юсуф Розиқов.
Маълумот учун: Фестиваль марҳум режиссёр Кира Муратова хотирасига бағишлаб «Оқ дунёни англай бориб» шиори остида ташкиллаштирилди.
Эслатиб ўтамиз, «Листопад» Гран-приси соҳиби номи келаётган ҳафтада эълон қилинади.
Изоҳ (0)