Ўзбекистон Мультипикацион фильмлар студияси директори Обид Асомов 27 октябрь — «Халқаро анимация куни» муносабати билан ташкил этилган «Ўзбек мультфильми: кеча ва бугун» мавзусидаги матбуот анжуманида ЎзМТРКнинг «Болажон» телеканалини танқид остига олди. Бу ҳақда ЎзА хабар бермоқда.
10 дақиқалик мультфильмнинг тайёрланиши учун давлат бюджетидан 400 миллион сўм сарфланади, мутахассислар эса 8 ой машаққат чекади. Биз катта маблағ эвазига ишлаётган мультфильмлар, менимча, давлат каналида намойиш этилиши керак. Аммо...Ҳали-ҳануз «Болажон» телеканалидаги кўринмас деворларини бузиб ўтолмаяпмиз. Хат билан қилган мурожаатларимиз зое кетмоқда. Аксинча, улар интернетдан ўғирлик қилиб, 2—3 соатлик тайёр чет эл мультфильмларини 5—6 киши билан овозлаштириб, қўпол айтганда, фойда кўрмоқда.
Уларни ҳам тушунаман, сабаби биз тайёрлаган мультфильмлардан моддий наф йўқ. Биринчидан, вақти кам — 10 дақиқа. Иккинчидан, тайёрлаб беряпмиз, улар бундан пул ишлаш имконига эга эмас. Мана муаммо қаерда — қанчадан-қанча маблағ беҳуда ҳавога совурилмоқда. Энг муҳими, қарийб ярим миллиард пул сарфланаётган анимацион фильмлар эфирга узатилиши керак эмасми?
Иложи бўлса, ҳафтанинг бирор кунида шу кунгача яратилган ўзбек мультфильмларининг намойиши учун вақт ажрацак. Болаларимиз фақат хориж мультфильмларини томоша қилаверса, тарбиясига салбий таъсир ўтказиши бор гап. Юртимизда ишланиб, жаҳон фестивалларида юқори ўринларни олиб келаётган анимацион фильмлар бор, уларни ҳам телеканалларимизда кўрсатайлик.
Болаларимиз мультфильмларимизни бир марта кўришни хоҳламас, икки марта хархаша қилар, аммо... барибир қизиқади, бола руҳияти шунақа, тез-тез ўзгариб туради. Фарзандларимизни ўзимизда ишланган миллий мультфильмлар томошасига ўргатиш вақти келди. Биз ҳам бу орада янада замонавий, кичкинтой томошабинларимизнинг қалбини бир лаҳзада забт этувчи мультфильмлар тайёрлашга қурбимиз етади.
Обид Асомов, Ўзбекистон Мультипикацион фильмлар студияси директори
Изоҳ (0)