Ўзбекистонда 2019 йилда олий таълим муассасалари раҳбар ходимлари ва профессор-ўқитувчилари иш ҳақи сезиларли даражада оширилиши кўзда тутилган. Бу ҳақда Молия вазирлигида бўлиб ўтган матбуот анжуманида маълум қилинди.
Президентнинг 2018 йил 14 августдаги қарори билан умумтаълим мактаблари ўқитувчиларининг малака тоифасига қараб уларнинг иш ҳақини табақалаштирган ҳолда ошириш, малака тоифасини бериш тартибини такомиллаштириш тўғрисида қарор қабул қилинди.
Жумладан, биринчи босқичда 2018 йил 1 сентябрдан бошлаб бошланғич синфлар ўқитувчилари базавий тариф ставкалари миқдори 10 фоиз, юқори синф ўқитувчилари базавий тариф ставкалари миқдори 24 фоизгача, директорлар, уларнинг ўринбосарлари ва кутубхоначилар базавий тариф ставкалари миқдори 10 фоизга оширилди.
Иккинчи босқичда малака тоифасига қараб ўқитувчиларга 10 фоиздан 25 фоизгача, директорлар, уларнинг ўринбосарлари ва кутубхоначиларга яна 10 фоизга оширилди.
Натижада 2019 йил 1 январга келиб 1-тоифали ўқитувчининг базавий тариф ставкаси 45 фоизга ошади, қўлга тегадиган ойлик иш ҳақи, директор жамғармасидан ўртача 10 фоизгача устама ҳамда дафтарларни текширганлиги ва синфга раҳбарлик қилгани учун қўшимча ҳақлар тўланса, шунингдек, солиқ ислоҳоти натижасида 2,2 миллион сўмга етади.
Малака тоифасига эга бўлмаган мутахассис ўқитувчи ва олий тоифали ўқитувчи ўртасидаги фарқ 21 фоиздан 38 фоизга ошади.
Жорий йилда Президент томонидан олий ўқув юртлари профессор ва ўқитувчилари иш ҳақини ошириш тўғрисида иккита қарор қабул қилинди. Жумладан, 2018 йил 1 сентябрдан бошлаб уларининг лавозим маошлари табақалаштирилган ҳолда ўртача 25 фоизга оширилди.
Олий таълим муассасалари раҳбар ходимлари ва профессор-ўқитувчилари иш ҳақи миқдори 2019 йил 1 январдан бошлаб 20 фоизга ва 2019 йил 1 июлдан бошлаб 25 фоизга оширилади.
Изоҳ (0)