Ла Лига. «Реал Мадрид» бугун «Вальядолид»га қарши курашади, «Барселона» эса «Райо» майдонига сафар қилади

Бугун, 3 ноябрь санасида футбол бўйича Испания Ла Лигасининг 11-тури бошланади. Кун тақвимидан 4 та учрашув ўрин олган.

Турнинг илк ўйинида «Атлетико Мадрид» жамоаси «Леганес» майдонига сафар қилади. Ўйин 16:00 да бошланиши белгиланган.

Омадсиз даврларни бошдан кечираётган «Реал Мадрид» эса янги мураббий Сантьяго Солари қўл остида Ла Лигадаги илк ўйинда «Вальядолид»ни ўз майдонида қабул қилади. Қайд этиш жоиз, «Вальядолид»нинг айни дамдаги эгаси «Реал»нинг собиқ ҳужумчиси Роналдо ҳисобланади. Учрашув 19:15 да бошланади.

Дуранг натижалардан боши чиқмаётган «Валенсия» эса «Месталя» стадионида «Жирона»ни меҳмон қилади. Ўйин 21:30 да бошланади.

Пешқадам «Барселона» эса сафарда «Райо Вальекано»га қарши баҳс олиб боради. Беллашув 23:45 да бошланиши белгиланган.