Ўзбекистон Ички ишлар вазирлиги «2018—2022 йилларда Ўзбекистон Республикасида йўл ҳаракати хавфсизлигини таъминлаш Концепциясини амалга ошириш бўйича қўшимча чора-тадбирлар тўғрисида»ги ҳукумат қарори лойиҳасини ишлаб чиқиб, жамоатчилик муҳокамаси учун эълон қилди.
Ҳужжатда йўл ҳаракати хавфсизлигини таъминлаш ва замонавий йўл инфратузилмаларини яратиш соҳасида давлат-хусусий шерикчик механизмини татбиқ этиш таклиф қилинган. Бундай ҳамкорликнинг бир тури сифатида автомобиль йўллари бўйида тўлов қоидаларини бузишни қайд этувчи ахборот тизимлари билан таъминланган пуллик автотураргоҳлар ташкил этиш кўрсатилган.
Қарор лойиҳасида бундай автотураргоҳлар қуриш учун тадбиркорларга ер участкаларини 10 йил муддатгача ижарага бериш таклиф қилинган. Қурилиш ишларини амалга оширадиган компаниялар конкурс асосида танланади. Давлат ушбу жараёнда хусусий шерик томонидан шартнома шартлари бажарилишини мониторинг қилиш билан шуғулланади, холос.
Пуллик тўхташ жойлари ва автотураргоҳлардан тушган пулнинг бир (30 фоиздан ортиқ бўлмаган) қисмини маҳаллий бюджетга йўналтириш кўзда тутилган. Бу пуллар кейин маҳаллий йўл инфратузилмасини ривожлантиришга сарфланади.
Қолган 70 фоиз маблағ эса, ён-атрофдаги ҳудуднинг бандлик даражаси ва функсионал имкониятлардан келиб чиқиб, тадбиркорнинг ҳисобига кетади. Рағбатлантириш сифатида бир қатор имтиёзлар кўзда тутилган. Хусусан, инвесторларни 2022 йил 1 январга қадар бир қатор тўловлардан озод қилиш кўзда тутилган.
Қарор лойиҳаси бўйича муҳокама 14 ноябрга қадар давом этади. Лойиҳа ўзгартирилиши, тўлдирилиши ва рад этилиши мумкин.
Изоҳ (0)