Наманган вилояти Чуст туман тиббиёт бирлашмасининг шошилинч тез тиббий бўлимида кабобдан заҳарланиш ташхиси билан даволанаётган беморлардан олинган биологик намуналар вилоят ўта хавфли касалликлар лабораториясида текширилганда ўта хавфли юқумли касаллик қўзғатувчилари аниқланмади. Бу ҳақда Turon 24 хабар бермоқда.
Туман тиббиёт бирлашмасига 10 сентябрдан 23 октябрга қадар жами 27 нафар бемор «қоринда кучли оғриқ, кўнгил айниши, иситма, ҳолсизлик, қорин қисмида сув йиғилиши» каби шикоятлар билан мурожаат қилган.
Вилоят давлат санитария эпидемиология назорати марказининг 23 октябрдаги дастлабки текширув хулосасига кўра, туман овқатланиш шохобчаларидан олинган суртма, овқат маҳсулотлари намуналарида ўта хавфли юқумли касалликлар топилмаган.
Туман тиббий муассасасига ётқизилган 27 беморда муолажалардан сўнг аҳволи яхшиланган 15 нафарига уйига рухсат берилган. Беморларнинг икки нафари туман тиббиёт бирлашмасида, беш нафари Республика шошилинч тиббий ёрдам илмий маркази Наманган филиалида даволанмоқда. Қолган беморлар мурожаат билан келган куннинг ўзида тиббий кўрикдан ўтказилган ва аҳволи қониқарли бўлгани боис, шифохонага ётқизилмаган. Уларга дори воситалари ва қатъий парҳез тавсия қилинган.
Ҳозир вазиятга ойдинлик киритиш мақсадида, комиссиявий суд-тиббий экспертизаси тайинланган.
Мазкур ҳолат юзасидан туман прокуратураси томонидан терговга қадар текширув ҳаракатлари давом эттирилмоқда.
Мавзуга доир: Чустда 30 киши кабобдан заҳарланиб, шифохонага ётқизилди
Изоҳ (0)