Фотогалерея: Ўзбекистонда бадминтон федерациясининг янги биноси иш бошлади

Кеча, 27 октябрь куни Ўзбекистон бадминтон федерациясининг янги спорт иншооти ўз фаолиятини бошлади.

Очилиш маросимида Ўзбекистон Бош вазири ўринбосари Азиз Абдуҳакимов, Жисмоний тарбия ва спорт вазири Дилмурод Набиев, МОҚ Бош котиби Жасур Матчанов, спортчи ва мураббийлар, оммавий ахборот воситалари ходимлари ва бошқалар иштирок этди.

1 йил давомида қуриб фойдаланишга топширилган мажмуада 5 та бадминтон корти, 100 ўринли ётоқхона, кийиниш хоналари, тиббиёт хонаси, назарий билимлар учун мўлжалланган хоналар ва мураббийлар хонаси мавжуд.

Тадбирда бадминтончилар ўзига хос кўргазмали чиқишлар орқали йиғилганларга ўз маҳоратларини намойиш этиб берди.

Маълумот учун, Ўзбекистонда илк бор бадминтон федерацияси 2011 йил 26 август куни ташкил этилган. Республика бўйича 102 та бадминтон бўлимлари мавжуд. Бадминтон билан доимий шуғулланиб келаётган 6711 нафар (2955 та қизлар) спортчиларга 312 нафар мураббийлар таълим бермоқда. Ўзбекистонлик спортчилар 2015—2018 йиллар давомида бадминтон бўйича халқаро мусобақаларда 61 та медаль (11 та олтин, 13 та кумуш, 37 та бронза) қўлга киритган.